ஆத்திசூடி வெண்பா – இராம பாரதியார்

@0 தெய்வ வணக்கம் விநாயகர் துதி

#1
உலகம் புகழ் பாகை ஓங்கு தொண்டைநாட்டின்
திலகன் கணபதி மால் செல்வன் நலம் மிகுந்த
வாழ்வாகும் புன்னைவனநாதன் நல் தமிழ்க்குச்
சூழ் ஆத்திசூடி துணை
* ஆத்திசூடி விநாயகர்

@1 நூல்

#1
** அறஞ்செய விரும்பு கபிலை கதை
அருள் ஆர் கபிலை அறமே சயம் என்று
இருள் அகல வேங்கைக்கு இயம்பும் பெருமையினால்
மா வளரும் புன்னைவன நாதா மெய்த் துணையா
மேவி அறஞ் செய்ய விரும்பு

#2
** ஆறுவது சினம் சடபரதர் கதை
ஆதி சவ்வீரன் சிவிகைக்கு ஆளாய்ச் சடபரதர்
தீது பொறுத்துச் சிறப்புற்றார் சோதிப்
புய மா வளர்கின்ற புன்னைவன நாதா
செயம் ஆறுவது சினம்

#3
** இயல்வது கரவேல் அரிச்சந்திரன் கதை
இந்துமதி விற்றும் அலைந்து ஈனனுக்கு ஆள் ஆகி அரிச்
சந்திரனே தன் நிலைமை தப்பாதான் அந்த
மனுநெறி தேர் புன்னைவன நாதா பூமி
யினில் இயல்வது கரவேல்
* இந்துமதி சந்திரமதி

#4
** ஈவது விலக்கேல் சுக்கிரன் கதை
மாவலியை மாலுக்கு மண் உதவாமல் தடுத்த
காவலினால் சுக்கிரனும் கண் இழந்தான் ஆவதனால்
நல் நீதி புன்னைவன நாத மகிபா உலகத்
தின் ஈவது விலக்கேல்

#5
** உடையது விளம்பேல் சடாயுவின் கதை
உள்ளபடி தன் சிறகில் உண்டு பலம் என்று ஒரு சொல்
விள்ளும் சடாயு முனம் வீழ்ந்தது பார் வள்ளல்
தனபதியே புன்னைவனத் தாடாளா ஒன்னார்க்கு
இனது உடையது விளம்பேல்

#6
** ஊக்கமது கைவிடேல் பகாசூரன் கதை
ஊரின் நரபலிக்கா ஊர் சகடம் மேல் வீமன்
தீரன் பகாசூரன் தீது அடக்கும் காரணம் பார்
தேக்கு புகழ் புன்னைவன தீரனே யா உறினும்
ஊக்கமது கைவிடேல்

#7
** எண்எழுத்து இகழேல் துருவன் கதை
எண் அரிய கோள் உடுக்கள் எல்லாம் ஒருமையதாத்
திண்ணத் துருவர் கையில் சேர்ந்ததனால் மண் உலகில்
போற்றும் தமிழ்ப் பாகை புன்னைவன பூபா கேள்
ஏற்று எண் எழுத்து இகழேல்
* உடுக்கள் நக்ஷத்திரங்கள்

#8
** ஏற்பது இகழ்ச்சி திருமால் சரித்திரம்
மாவலி-பால் மண் இரக்க மாதவனே வாம உரு
ஆம் என்றான் மற்றவர்க்கு அஃது ஆகுமோ மூவுலகில்
பேர் பரவும் புன்னைவனப் பேரரசே எவ்வகையால்
சீர் பெறினும் ஏற்பது இகழ்ச்சி

#9
** ஐயம் இட்டுண் பிரமராக்ஷதன் கதை
வன் பிரமராக்கதன்தான் மங்கிலியப் பிச்சை அருள்
என்பவளுக்கே கொடுத்து ஈடேறினான் அன்பதனால்
வள்ளல் எனும் புன்னை வனநாதா வஞ்சம் இலாது
உள்ளத்திலே ஐயம் இட்டு உண்

#10
** ஒப்புற வொழுகு தாரணியின் தன்மை
தாரணி போல் எவ்வுயிரும் தாங்கும் தகைமையதாச்
சீர் அணிந்து நாளும் சிறந்து ஓங்க ஆரம்
தழைந்த புகழ்ப் புன்னைவனத் தாடாளா யார்க்கும்
குழைந்து ஒப்புறவு ஒழுகு

#11
** ஓதுவது ஒழியேல் வேதவியாசர் கதை
மச்சகந்தி-தன் வயிற்றில் வந்து உதித்தும் ஓதலினால்
விச்சை பெற்ற வேத வியாசனைப் பார் நிச்சயமே
பன்னு தமிழ்ப் புன்னைவன பார்த்திபா உண்மை நூ
லின் ஓதுவது ஒழியேல்
* பார்த்திபன் – அரசன்

#12
** ஔவியம் பேசேல் உத்தரன் கதை
மாதர் முன்னே உத்தரனும் மா பலவான் போல் உரைத்து
காது அமரில் அர்ச்சுனனால் கட்டுண்டான் ஆதலினால்
வண்மை பெறு புன்னைவன நாதா சீர் உடைய
திண்மை உன்னி ஔவியம் பேசேல்
* ஔவியம் – பொறாமை

#13
** அக்கஞ் சுருக்கேல் சிட்டுக் கதை
மைக் கடல் கொள் முட்டை-தனை வாங்குவோம் என்று சிட்டு
புக்கு அதனை வென்றது தன் புத்தியினால் அக் கதை போல்
வேளாளர் புன்னைவன மேகமே உண்மை எனக்
கேளாய் அக்கம் சுருக்கேல்
* மை – நீர்

#14
** கண்டொன்று சொல்லேல் சத்தியவிரதன் கதை
கள்ளம் இன்றி முன்னே கன சத்தியவிரதன்
உள்ளது சொல்லிக் கலந்தான் ஓர் வழியைத் தெள்ளிமையோய்
மா தனதா புன்னைவன வள்ளலே மேல் எண்ணா
ஏதும் கண்டு ஒன்று சொல்லேல்

#15
** ஙப்போல் வளை காக்கைகளின் இயல்பு
தீது_இல் அரிட்டங்கள் செய்ய உணவைக் கொள்ள
மேதினியில் தம் இனத்தை மேவுதலால் நீதிநெறி
போற்று புகழ்ப் புன்னைவன பூபால உற்றாரை
மால் திரு மெய் ஙப் போல் வளை

#16
** சனி நீராடு
ஞாயிறு உயிர்க்கு ஈறு திங்கள் நம்பர் அருள் செய்கிலர் செவ்
வாய் பிணி துக்கம் குருநாள் வாழ்வு போம் தூய வெள்ளி
போடு இவைகள் புன்னைவன பூபாலா மிக்க புத
னோடு சனி நீராடு

#17
** ஞயம்பட உரை பட்டினத்துப்பிள்ளை இயல்பு
தொட்டு அடித்தோன் நன்றி செய்த தூயோன் இருவருக்கும்
பட்டினத்துப்பிள்ளை பகர்ந்தது பார் மட்டு உலவும்
தென் பாகை புன்னைவன தீரனே யாரிடத்தும்
அன்பாய் ஞயம்பட உரை
* மட்டு தேன்

#18
** இடம்பட வீடிடேல்
நித்தியமாம் வீட்டு நெறியில் இடம் பாடு அல்லால்
பொய்த்த இன்ப வீட்டில் பொருள் அடையாது அத்தம்
நடை அறியும் புன்னைவன நாதனே பூமி
யிடை இடம்பட வீடு இடேல்

#19
** இணக்கம் அறிந்து இணங்கு விக்கிரமாதித்தன் கதை
செய்ய புகழ் விக்கிரமாதித்தன் ஒரு தட்டாரப்
பையல் உறவு பற்றிப் பட்டதனால் வையம்
மணக்கும் சீர்ப் புன்னைவன நாதா நீயும்
இணக்கம் அறிந்து இணங்கு

#20
** தந்தைதாய்ப் பேண் கருடன், அந்தணன் ஆகியவர்களின் கதை
அனை இடர் தீர்த்தான் கருடன் அந்தணன் செங்கந்தை-
தனை எடுத்துச் சாவு தவிர்த்தான் இனையவர் போல்
சீர் ஆரும் புன்னைவன தீரனே நாள்-தோறும்
பேர் ஆரும் தந்தை தாய்ப் பேண்

#21
** நன்றி மறவேல்
உன் நாட்டார் நன்றால் உயிர் காத்துக் கோத்திரத்தில்
எந்நாளும் வாழ்ந்தே இருப்பதனால் பல் நாளும்
பூதலத்தில் மேன்மை பெறு புன்னைவன நாதனே
ஏதம் அற நன்றி மறவேல்

#22
** பருவத்தே பயிர்செய் வேளாளர் கதை
உன் நாட்டில் பொற்களந்தை ஊரர் நல் நாள் செய்த பயிர்
பொன்னே விளையப் புகழ் பெற்றார் ஒன்னார்
பயந்திடு வேல் புன்னைவன பார்த்திபா நீயும்
செய்யும் பருவத்தே பயிர்செய்

#23
** மண்பறித்து உண்ணேல் கூதைசகடன் கதை
கூற வழக்கு எண்ணாத கூதைசகடற்கு வண்டில்
ஏற முன் போல் வாராதிருந்ததனால் தேறி என்றும்
மா திலகா புன்னைவன மன்னா கேள் பூமியதில்
ஏதிலன் மண் பறித்து உண்ணேல்
* ஏதிலன் அயலான்

#24
** இயங்கித் திரியேல்
மன்னவனுக்கு உன் நாட்டார் வந்து முடிசூட்ட
முன் அனலில் மூழ்கி முதன்மை பெற்றார் அன்னவர் போல்
நன்று அறியும் புன்னைவன நாதனே வையகத்தில்
என்றும் இயங்கித் திரியேல்

#25
** அரவம் ஆட்டேல் பரிசித்து கதை
இருடி மேல் செத்தபாம்பு ஏற்றிப் பரிச்சித்து
அரவினால் பட்டது அறிந்தே திரைக் கடல் சூழ்
மண்ணுலகில் புன்னைவன மன்னவா பாவம் இது என்று
எண்ணி அரவம் ஆட்டேல்
* அரவம் பாம்பு

#26
** இலவம்பஞ்சியில் துயில்
அன்னத்தின் தூவி பொங்கர் ஆகும் அரசற்குப்
பன்னும் பருத்திதான் பாங்கு அலவே அன்னதனால்
மன்னன் எனும் புன்னைவன நாதா மை இரவில்
துன் இலவம் பஞ்சில் துயில்
* தூவி இறகு

#27
** வஞ்சகம் பேசேல் தூருவாசர் கதை
மாயனார்-தம் மக்கள் மா முனியைக் கேட்ட கெற்பம்
ஏய் அவரைக் கொல்லும் இருப்புலக்கை ஆயதனால்
மாரன் எனும் புன்னைவன நாதா வையத்தில்
சீருறா வஞ்சகம் பேசேல்
* மாரன் மன்மதன்

#28
** அழகலாதன செயேல் வாணாசுரன் கதை
வாணன் சிவனை வணங்கி வசம்செய்து உலகோர்
காண நின்று தன் வாயில் காக்கவைத்துப் பாணி எலாம்
போனதனால் புன்னைவன பூபாலா யாரிடத்தும்
தான் அழகு அலாதன செய்யேல்

#29
** இளமையில் கல் காளிதாசன் கதை
கல்வி இளமைக்குள் இலாக் காளிதாசன் மனையாள்
வல் வசையால் பொல்லா மரணமுற்றுச் செல்லலுற்றாள்
நல் தாமா புன்னைவன நாதா இதை அறிந்து
கற்றால் இளமையில் கல்

#30
** அறனை மறவேல் பத்திரகிரியார், சனகன், விதுரன்
** ஆகியவர்களின் இயல்பு
பத்திரகிரிராசன் பகர் சனகன் மெய் விதுரன்
சித்த பரிசுத்தம் செலுத்தியதால் இத் தரையில்
மன்னன் எனும் புன்னைவன நாதா யா உறினும்
இன்பாம் அறனை மறவேல்

#31
** அனந்தல் ஆடேல்
காலை துயில் சீலம் போம் கண்ட பகல் ஆக்கம் போம்
மாலை துயில் நோயாம் வகையறிந்து ஞாலமதில்
புண்ணியம் எலாம் தெரிந்த புன்னைவன நாதா
எண்ணி அனந்தல் ஆடேல்
* அனந்தல் தூக்கம்

#32
** கடிவது மற இரணியன் கதை
இரணியனும் ஆங்காரத்து எண்ணாது உரைத்து
நரஹரியால் இற்றான் முன் நாளில் சுரதருவைப்
போலே கொடுக்கின்ற புன்னைவன நாதா
மாலே கடிவது மற
* நரஹரி – நரசிங்கம்
* சுரதரு – கற்பகம்

#33
** காப்பது விரதம் சிலாதன் கதை
துய்ய சிலாதன் செய் துங்க விரதங்கள் எலாம்
செய்ய நந்தியாகச் சிறப்புற்றான் பொய் அலவே
தேன் கால் சொல் புன்னைவன தீரனே ஐம்புலனைத்
தான் காப்பது விரதம்

#34
** கிழமை படவாழ் தொண்டைமண்டலத்தார் கதை
தண் தமிழ்க்காக் கம்பருக்குத் தாம் அடிமை என்று தொண்டை
மண்டலத்தார் ஏட்டில் வரைந்தது போல் எண் திசைக்கும்
பொன்னான புன்னைவன பூபாலா தென் பாகை
மன்னா கிழமைபட வாழ்
* கிழமை உரிமை

#35
** கீழ்மை அகற்று
பெண்கேட்ட வேந்தனுக்குப் பெண் நாயைப் பந்தரிலே
கண் காண நின் குலத்தார் கட்டிவைத்த பண்பது பார்
நன் பாகை புன்னைவன நாதனே அப்படிப் போல்
துன்பான கீழ்மை அகற்று

#36
** குணமது கைவிடல்
நீர் கலந்த பாலை அன்னம் நீர் பிரித்துக் கொள்வது போல்
சீர் கலந்தார் நற்குணமே தேர்ந்து கொள்வார் ஏர் கொள்
புகழாளா புன்னைவன பூபாலனே மிக்
க குணமது கைவிடேல்

#37
** கூடிப் பிரியேல் அருச்சுனன் கதை
அர்ச்சுனன் மால் சார்பு இழந்த அன்றே கருதலர்த் துன்
கைச் சிலை வெற்பாக் கனத்துக் கை தளர்ந்தான் நிச்சயமே
மன்றல் சூழ் புன்னைவன நாதா தக்கோரை
என்றும் கூடிப் பிரியேல்

#38
** கெடுப்பது ஒழி இராமன் கதை
வாலி கெட ராமன் ஒரு வாளி தொட்ட வெம் பழிக்கா
மேல் ஒரு சன்மத்தில் அன்னோன் மீண்டு கொன்றான் ஞாலமதில்
வல்லவனே புன்னைவன நாதா யாரெனினும்
ஒல்லை கெடுப்பது ஒழி

#39
** கேள்வி முயல் பகவத்கீதை மான்மியம்
முன் பகவற்கீதை முனி உரைக்கக் கன்னிமரம்
தன்படியே கேட்டு உலகில் தார்வேந்தா அன்புறல் போல்
மாதவனே புன்னைவன நாதா நன்மையுற
மூதறிவோர்க் கேள்வி முயல்

#40
** கைவினை கரவேல் இந்திரன் கதை
இந்திரன் வாள் வைக்க எடுத்து முன்னே மா தவத்தோர்
தம் தருமம் விட்டுத் தவம் அழிந்தார் சந்ததமும்
பாகையில் வாழ் புன்னைவன பார்த்திபா ஆகையினா
லே கைவினை கரவேல்

#41
** கொள்ளை விரும்பேல் துரியோதனன் கதை
கொட்டமிட்டே உத்தரத்தில் கோக் கொள்ளையாட வந்து
துட்டன் அரவக்_கொடியோன் தோற்று இடுக்கண்பட்டதனால்
நீதிபரா புன்னைவன நேயனே ஏதெனினும்
பேதைமையாக் கொள்ளை விரும்பேல்

#42
** கோதாட்டொழி செம்பியன் கதை
நம்பனுக்கு ஆம் செவ்வந்தி நல் மலர் வேசிக்கு அளித்த
செம்பியனும் மண்மழையால் சீர் அழிந்தான் அம் புவியில்
எவ்வாறும் புன்னைவனத்து ஏந்தலே நீ நீதிக்கு
ஒவ்வாத கோதாட்டு ஒழி
* கோதாட்டு குற்றமான செய்கை

#43
** சக்கரநெறி நில் தண்டன் கதை
மண்டலத்தில் செங்கோல் வழியில் செலுத்தாமல்
தண்டகன் என்னும் ஒருவன் தான் மடியக் கண்டதனால்
வேள் புரையும் புன்னைவன வித்தகா எந்நாளும்
நீள் சக்கர நெறி நில்
* வேள் மன்மதன்

#44
** சான்றோர் இனத்திரு அகத்தியர் கதை
ஈசன் உமை மணத்திலே வட திக்கு ஆழ்ந்தது எனக்
காசினி சீராகக் கலசமுனி வாசமதால்
செய்தது பார் புன்னைவன தீரனே அப்படிச் சீர்
எய்திடச் சான்றோர் இனத்து இரு
* கலசமுனி அகஸ்தியர்

#45
** சித்திரம் பேசேல் சூர்ப்பநகி கதை
சீதை பண்பு இராவணற்குச் செப்பிக் குலம் கெடுத்த
பாதகி மூக்கு அன்று இழந்த பங்கம் பார் ஆதலினால்
தாரணிக்குள் புன்னைவனத் தாடாளா தன்னை எண்ணாச்
சேரலர்க்குச் சித்திரம் பேசேல்

#46
** சீர்மை மறவேல் கங்கைகோத்திரன் கதை
உற்ற தொடைப்புண்ணுக்கு உடை கீறிக் கட்டி நின்றான்
கொற்றவன் முன் உன் கங்கை_கோத்திரத்தான் வெற்றி புனை
மன்னான புன்னைவன வள்ளலே ஆதலினால்
எந்நாளும் சீர்மை மறவேல்

#47
** சுளிக்கச் சொல்லேல் சகுனி கதை
சகுனி துரியோதனற்குச் சற்பனையாக் கேடு
மிக உரைத்துத் தன் உயிரும் ஈந்த தகை பார்
மனுநெறி தேர் புன்னைவன நாதா யாவர்
எனினும் சுளிக்கச் சொல்லேல்

#48
** சூது விரும்பேல் பாண்டவர் கதை
தோராத நூற்றுவரும் தோற்ற பஞ்சபாண்டவரும்
பாரே அகன்று பட்ட பாரதம் பார் பேராண்மை
வற்றாத புன்னைவன மா கடலே மிக்க செல்வம்
பெற்றாலும் சூது விரும்பேல்

#49
** செய்வினை திருந்தச் செய் தக்கன் கதை
வேள்விக்கு மூவருமே வேண்டும் என்று எண்ணாமல்
தாழ்வு செய்து தக்கன் தலை இழந்தான் ஏழுலகும்
வீசு புகழ்ப் புன்னைவன வித்தகா செய்கை அறிந்
தே செய் வினை திருந்தச் செய்

#50
** சேர்விடம் அறிந்து சேர் மார்க்கண்டன் கதை
இருமைக்கும் மெய்த் துணை ஆம் என்று மார்க்கண்டன்
அரன் அடியைச் சேர்ந்தான் அவன் போல் அருள் பெருகும்
பூசாபலா பாகை புன்னைவனமே மனம் ஒத்
தே சேர்விடம் அறிந்து சேர்
* பூசாபலம் தேவபூசையின் பலன்

#51
** சையெனத் திரியேல் மாரீசன் கதை
தூய ரகுராமன்-பால் சோரம் உனி மாரீசன்
மாயமானாய்த் திரிந்து மாய்ந்தது பார் ஞாயம் அன்று
வீசு புகழ் புன்னைவன மேகமே இத் தலத்தி
லே சையெனத் திரியேல்
* சையென சீ என்று அருவருக்கும்படி

#52
** சொற்சோர்வு படேல் கும்பகர்ணன் கதை
நித்தியத்தைக் கேட்கப் போய் நித்திரை என்றே குளறிப்
புத்தி அற்ற கும்பகர்ணன் பொன்றினன் பார் மத்த மத
குன்றம் போல் புன்னைவனக் கொற்றவா பாகை மன்னா
என்றும் சொல் சோர்வுபடேல்

#53
** சோம்பித் திரியேல் நளன் கதை
நளன் இருதுபன்னன் தேர் நாள் ஒன்றில் வீமன்
வள நகரில் சேர்த்து மனையாள் உளம் மகிழ
நின்றது பார் புன்னைவன நேயனே தன் முயற்சி
என்றும் சோம்பித் திரியேல்

#54
** தக்கோனெனத் திரி திருஞானசம்பந்தர் கதை
சைவ சமயத்தைத் தலையாகச் சம்பந்தர்
செய்ததனால் யாண்டும் சிறப்புற்றார் வையகத்தில்
பொங்கு புகழ்ப் புன்னைவன பூபாலா பாகை மன்னா
எங்கும் தக்கோன் எனத் திரி

#55
** தானமது விரும்பு கன்னன் கதை
முன் செய் அறத்தை முகுந்தற்கு அளித்த கன்னன்
பின் செயலும் ஈதலுறப் பேறு பெற்றான் தன் செயல் பொன்
தாதாவாம் புன்னைவனத் தாடாளா பூமியின் மே
லே தானமது விரும்பு
* முகுந்தன் கிருஷ்ணமூர்த்தி

#56
** திருமாலுக்கு அடிமைசெய்
அண்டர் முனிவர்க்கா அவதாரம் பத்து எடுத்து
மிண்டரை வெட்டித் தருமமே புரக்கக் கண்டதனால்
மந்தரனே புன்னைவன வள்ளலே எந்நாளும்
செந்திரு மாலுக்கு அடிமை செய்
* மிண்டர் இராக்கதர்

#57
** தீவினை அகற்று தானவர் இயல்பு
ஈசன் வரமும் சிதைந்தே எய்திய பேர் ஆக்கமும் போய்த்
தேசு அழிந்து தானவர்கள் தேய்ந்ததனால் காசினியில்
வாழ் பாகை புன்னைவன மன்னவா நன்மை அன்றிச்
சூழ் தீவினை அகற்று
* ஆக்கம் செல்வம்
* தேசு அழகு

#58
** துன்பத்திற்கு இடங்கொடேல் இந்திரன் கதை
தூய ராமன் பகையால் துன்பமுற்றுத் தஞ்சம் என்ற
சேயினையும் தேவேந்திரன் இகழ்ந்த ஞாயம் பார்
மா துங்கா புன்னைவன மன்னவா அஃது அறிந்
தே துன்பத்திற்கு இடம்கொடேல்
* சேய் புத்திரன்

#59
** தூக்கி வினைசெய் வாலி கதை
எதிரி பலம் பாதி கொள்வான் என்று அறிந்து வாலி
வதைபுரிய ராமன் மறைந்து துதி பெறல் பார்
பார் அளந்த புன்னைவன பார்த்திபா அப்படிப் போல்
சீர் அறிந்து தூக்கி வினை செய்

#60
** தெய்வம் இகழேல் திரிபுரவாசிகள் கதை
தாரகத்தார் மூவரையும் தாழ்வுசெய்து தங்கள்தங்கள்
காரியத்தால் வேறு கதி அளித்தார் தாரணிக்குள்
மா தவனே புன்னைவன நாதா மீது இடுக்கண்
ஏதுறினும் தெய்வம் இகழேல்
* தாரகத்தார் சிவபெருமான்
* தாரணி பூமி

#61
** தேசத்தோடு ஒத்துவாழ்
எல்லா மதத்திற்கும் எவ்வுயிருக்கும் நீர் நிழல் போல்
நல் ஆதரவே நயந்து அருளி வல்லாண்மை
சூழ் தேக புன்னைவனத் தோன்றலே நீயும் என்றும்
வாழ் தேசத்தோடு ஒத்து வாழ்

#62
** தையல்சொற் கேளேல் சித்திராங்கி கதை
மாது சித்திராங்கி சொல்லால் மைந்தனைக் கை கால் களைந்து
ஏது பெற்றான் ஓர் மன்னன் இப் புவியில் நீதிநெறி
மா தவனே புன்னைவன நாதா பாகை மன்னா
ஏதெனினும் தையல் சொல் கேளேல்

#63
** தொன்மை மறவேல் பாஞ்சாலன் கதை
பண்டு துரோணன் பழமை எண்ணாப் பாஞ்சாலன்
மிண்டு அமரில் அர்ச்சுனனால் வீறு அழிந்தான் கண்டது அன்றோ
பொன் ஆளும் புன்னைவன பூபாலா தன்னை அறிந்து
எந்நாளும் தொன்மை மறவேல்
* பண்டு பண்டைக்காலம்

#64
** தோற்பன தொடங்கேல் மகிடாசூரன் கதை
சண்டனொடு மிண்டன்-தனை வென்ற சங்கரி-பால்
மிண்டு மகிடன் பொருது வெட்டுண்டான் புண்டரிக
மாது ஆரும் புன்னைவன நாதா நீள் நிலத்தி
லே தோற்பன தொடங்கேல்
* மிண்டு நெருங்கி

#65
** நன்மை கடைப்பிடி அரசின் கதை
அரசமரம் தொல் கடல் நீந்து அந்தணனைக் கால
புர வழியில் காத்த புகழின் பெருமையைப் பார்
மன்றல் அம் தார் புன்னைவன வள்ளலே யாவர்க்கும்
என்றும் நன்மை கடைப்பிடி
* மன்றல் வாசனை
* காலபுரம் எமபுரம்

#66
** நாடொப்பன செய் தருமர் கதை
நாடு ஓடும் போது நடு ஓட வேண்டும் என்று
தேடும் தருமர் சொன்ன சீரதனால் நீடு
பொருந்து புகழ் புன்னைவன பூபாலா நன்றாத்
தெரிந்து நாடு ஒப்பன செய்

#67
** நிலையிற் பிரியேல் மலைகளின் கதை
சஞ்சரித்துநின்ற சயிலங்களை எல்லாம்
வெம் சினத்தால் இந்திரன் முன் வெட்டினதால் செம் சரணால்
மண் அளந்த புன்னைவன நாதா என்றும் நன்மை
எண்ணி நிலையில் பிரியேல்

#68
** நீர் விளையாடேல் கண்ணன் மக்கள் கதை
கண்ணன் அருள் மைந்தர் கரும் கடலில் நீராடி
எண் அரும் வாட்கோரையினால் இற்றனரால் புண்ணியத்தின்
கண்ணான புன்னைவனக் காராளா மேல் வரும் கேடு
எண்ணா நீ நீர் விளையாடேல்

#69
** நுண்மை நுகரேல் கௌசிகன் மாணாக்கர் கதை
கோசிகன் மாணாக்கர் கூறு அரிய நாய் நிணத்தைப்
போசனம்செய்தே புலையாய்ப் போயினரால் வீசு புகழ்த்
தென் பாகை புன்னைவன தீரனே எள்ளளவும்
இன்பாக நுண்மை நுகரேல்

#70
** நூல் பல கல் கவி வீரராகவ முதலியார் கதை
கற்றதனால் உங்கள் கவிவீரராகவ மால்
வெற்றி பரராசசிங்கம் மேன்மைசெயப் பெற்றதனால்
ஞாலமதில் புன்னைவன நாதனே நல் பருவ
காலமதில் நூல் பல கல்

#71
** நெற்பயிர் விளை
அண்டர் முதலோர்க்கு அமிர்தமயமா வடிவு
கொண்டு அறமே முத்திக்கும் கொள் கருவாக் கண்டதனால்
தக்க புகழ் புன்னைவனத் தாடாளா எப் பயிர்க்கும்
மிக்க குண நெற்பயிர் விளை
* கரு வித்து

#72
** நேர்கோனெறி நில் வேளாளர் இயல்பு
வேத நெறி நின்ற வேதியர் போல் நின் மரபோர்
ஆதி முதலாப் புகழை ஆண்டது பார் ஆதுலர்க்குத்
தாயான புன்னைவனத் தாடாளா பாகை மன்னா
நீயும் நேர் கோன் நெறி நில்
* ஆதுலர் யாசகர்

#73
** நைவினை நணுகேல் இராமர் கதை
செய் தவமும் பாராமல் சீராமன் சம்புகனை
நைதல் இன்றிச் சென்னி கொண்ட ஞாயம் பார் உய் தரும
வானே நல் புன்னைவன நாதா மிக்க துஷ்ட
ரேனும் நைவினை நணுகேல்
* நைதல் வருந்துதல்
* உய்தல் பிழைத்தல்

#74
** நொய்ய வுரையேல் அருச்சுனன் கதை
கந்தருவன் தஞ்சம் என்ற காலையில் மாயோன் பகையைச்
சிந்தையில்வைத்து எண்ணினனோ தேர் விசயன் பைந்தமிழோர்
போற்று புகழ்ப் புன்னைவன பூபாலா யாரெனினும்
ஏற்றதன் பின் நொய்ய உரையேல்

#75
** நோய்க்கு இடங்கொடேல் இலக்குமணன் கதை
பசி நோய் இலக்குமணன் பார் வனத்தில் முன்னே
நசியாமல் நீக்கி நலமா இசைபெற்றான்
பொன் ஆளும் புன்னைவன பூபாலா அப்படிப் போல்
எந்நாளும் நோய்க்கு இடம்கொடேல்
* நசியாமல் தான்கெடாமல்

#76
** பழிப்பன பகரேல் கைகேசி கதை
சூடும் முடி ராகவனார் சூடாமல் கைகேசி
கேடு சொல்ல நிந்தை கிடைத்தது பார் நீடு புகழ்க்
காராளா புன்னைவனக் கற்பகமே யாரிடத்தும்
ஏராப் பழிப்பன சொல்லேல்
* ஏர் அழகு

#77
** பாம்பொடு பழகேல் வாசுகி கதை
வாசுகி முன் நாள் பழகும் வானோர்க்கு அமுது எழும் முன்
மோசமுற நஞ்சு உமிழ்ந்த மூர்க்கம் பார் காசினியில்
நன்று அறியும் புன்னைவன நாதா இதை அறிந்தே
என்றும் பாம்போடு பழகேல்

#78
** பிழைபடச் சொல்லேல் சாபாலி கதை
சாபாலி ராமன் சபையில் ஓர் சொல் பிழைத்துக்
கோபாலன் அம் சுடர் மெய் குன்றியே சோபமுற்றான்
ஆதலினால் புன்னைவன ஐயனே எவ்விடத்தும்
ஏதும் பிழைபடச் சொல்லேல்
* சோபம் வருத்தம்

#79
** பீடுபெற நில் வேளாளர் இயல்பு
நீலி பழியைக் களைந்து நின் மரபில் வேளாளர்
சூலி முதுகில் சுடவே சோறிட்ட மேலான
ஞாயம் பார் புன்னைவன நாதனே அப்படிப் போல்
நீயும் மிகப் பீடு பெற நில்

#80
** புகழ்பட வாழ் இந்திரத்துய்ம்மன் கதை
விழும் இந்திரத்துய்ம்மன் மிக்க புகழ் சொல்லிக்
கழறும் முன் மால் நல் கழல் சேர் காதை பழமை அன்றோ
செய்ய புகழ்ப் புன்னைவன தீரனே நீயும் இந்த
வையம் புகழ் பட வாழ்

#81
** பூமி விரும்பு
தலம் தீர்த்தம் தானம் தவம் சேர் சந்தானம்
நலம் பெறலால் தேவர் எலாம் நாடி நிலம் துதிப்பார்
மந்திரியே புன்னை வனநாதா ஆதலினால்
புந்தியில் நீ பூமி விரும்பு

#82
** பெரியாரைத் துணைக்கொள் பிரகலாதன் கதை
தந்தை இரணியனைத் தள்ளி அவன் மைந்தன் முன்னே
சிந்தையில் மாயோன் துணையே தேடி உய்ந்தான் சந்ததமும்
நட்பு அறியும் புன்னைவன நாத மகிபா உலகிற்
குள் பெரியாரைத் துணைக் கொள்

#83
** பேதைமை அகற்று திலீபன் கதை
கோ வதைசெய்யப் பிடித்த கோளரிக்குத் தன் உடலை
ஈவன் என்றானே திலிபன் என்னும் மன்னன் ஆவதனால்
நட்பாளும் புன்னைவன நாத மன்னா எப்போதும்
உள் பேதைமை அகற்று

#84
** பைதலோ டிணங்கேல் கட்டியங்காரன் கதை
சச்சந்தனை முன் சதி கட்டியங்காரன்
நிச்சயமாச் செய்த நிறை பிழை பார் பொன் சிகர
தீபம் எனும் புன்னைவன தீரனே ஆனது கண்
டே பைதலோடு இணங்கேல்
* பைதல் சிறுபிள்ளைத்தனம்

#85
** பொருள்தனைப் போற்றிவாழ் நவநிதி பெற்ற ஒருவன் கதை
நவநிதி பெற்றும் தன் நம்பர் அருள் இல்லார்க்கு
அவிழும் நல்கான் காப்பான் அவன் போல் புவி தழையத்
தேன் பொழி சொல் புன்னைவன தீரனே நீ என்றும்
வான் பொருள்-தனைப் போற்றி வாழ்
* அவிழ் சோறு

#86
** போற்றடிப் பிரியேல் பிருங்கிமகரிஷி கதை
சங்கரனை அன்றி உமை-தன்னை வலம்செய்யாமல்
பிருங்கிரிஷி மூன்று கால் பெற்றதனால் துங்க
மனம் தளராப் புன்னைவன நாதா தொண்டர்
இனம் போற்று அடிப் பிரியேல்

#87
** மனந்தடுமாறேல் கஞ்சனூர் ஆழ்வார் கதை
கஞ்சனூர் ஆழ்வார் கலங்காது அறம் செய்தே
எஞ்சாப் பரமபதம் எய்தினர் பார் தஞ்சம் என்பார்
புண்ணிய மா மெய்த் துணையாம் புன்னைவன பூபதியே
எண்ணி மனம் தடுமாறேல்

#88
** மாற்றானுக்கு இடங்கொடேல் காகத்தின் கதை
காகம் வருந்தி வரக் கார் இருளில் நன்மை செய்த
கூகை பகல் பட்ட கொடுமையினால் வாகு
புனை தாமா புன்னைவன பூபாலா மோசம்
என மாற்றானுக்கு இடம்கொடேல்

#89
** மிகைப்படச் சொல்லேல் சங்கராசாரியார் கதை
சங்கராசாரியனார் தாயை இகழ் குலத்தார்
தங்கள் மனையே சுடலைதான் ஆகப் பங்கமுற்றார்
ஆதலினால் புன்னைவன ஐயனே யாரிடத்தும்
ஏதும் மிகைபடச் சொல்லேல்

#90
** மீதூண் விரும்பேல்
இழிவு அறிந்து உண்பான்-கண் இன்பம் போல் நிற்கும்
கழி பேர் இரையான்-கண் நோய் என்று உள முதுநூல்
வாக்கியத்தால் புன்னைவன நாதா முன் அயிறல்
போக்கி மீதூண் விரும்பேல்

#91
** முனைமுகத்து நில்லேல் நரியின் கதை
ஆட்டுக்கடாப் போரில் அன்று உதிரம் வேட்டு நரி
மாட்டிக்கொண்டே உயிர் போய் மாண்டது பார் தோட்டு மலர்
மா மருவும் புன்னைவன நாதா வீணாகவே
முனைமுகத்து நில்லேல்

#92
** மூர்க்கரோடு இணங்கேல் விடதாரி கதை
வேங்கை வரிப் புலிக்குத் தீர்த்த விடதாரி என
ஓங்கும் ஔவை சொல் மூதுரைப் பொருள் பார் பாங்குடைய
காம் ஆற்றும் புன்னைவனக் காராளா வையகத்தி
லே மூர்க்கரோடு இணங்கேல்

#93
** மெல்லினல்லாள் தோள்சேர்
போதவே நற்குணங்கள் போந்தும் தனை மூத்த
மாதர் இன்பம் தீதே மனுநெறி பார் ஆதலினால்
துய்ய புகழ்ப் புன்னைவனச் சோமா இளையாளாம்
செய்ய மெல் இல் நல்லாள் தோள் சேர்
* போத முழுதும்

#94
** மேன்மக்கள் சொற்கேள் தசரதன் கதை
ஆசிரியன் சொல் கேட்ட அன்றே தசரதனார்
கோசிகன்-பால் ராகவனைக் கூட்டியதால் தேசு பெற்றார்
நாள் கமலைப் புன்னைவன நாத மகிபா தருமம்
கேட்கின் மேன்மக்கள் சொல் கேள்

#95
** மைவிழியார் மனையகல் விப்பிரநாராயணர் கதை
விப்பிரநாராயணன் முன் வேசி-தன் மேல் ஆசையினால்
இப் புவியில் கட்டுண்டு இழுக்குற்றான் தப்பு அலவே
சைவநெறிப் புன்னைவனத் தாடாளா எந்நாளும்
மை_விழியார் மனை அகல்

#96
** மொழிவது அறமொழி புருஷாதி மிருகத்தின் கதை
வீமன் உடலில் பாதி மெய் வழக்கில் தேர்ந்து புருடாமிருகத்தின்
பங்கு என்றார் தருமர் ஆம் அவர் போல்
பூமி எலாம் கொண்டாடும் பொய்யாத புன்னைவன
மே மொழிவது அற மொழி

#97
** மோகத்தை முனி
தேவர் முனிவர் மண்ணோர் தென்புலத்தார்க்கும் மோகம்
பாவ வித்து என்று ஓதும் பழ மறைகள் ஆவதனால்
வேளாள புன்னைவன வித்தகா இத் தரையில்
மூளும் மோகத்தை முனி

#98
** வல்லமை பேசேல் பூதனை கதை
குழந்தை என்று மாயனைப் பேய் கொல்ல முலைப்பால் ஈந்து
இழந்தது உயிர் என்பது உலகு எங்கும் முழங்குதலால்
வீறாளா புன்னைவன மேகமே யாரிடத்தும்
மாறான வல்லமை பேசேல்
* மாயன் கிருஷ்ணன்

#99
** வாதுமுற் கூறேல் விசுவாமித்திரன் கதை
இந்திரன் முன் கோசிகன் வதிட்டருடன் வாதில் அரிச்
சந்திரனைப் பொய்யன் என்ற தப்பிதத்தால் வந்தது பார்
மா தவனே புன்னைவன நாதா வாய் இடும்பால்
ஏதெனினும் வாது முன் கூறேல்

#100
** வித்தை விரும்பு திருவள்ளுவர் கதை
வள்ளுவரைக் கல்வி அன்றோ வண் தமிழ்ச் சங்கம் செயிக்கத்
தெள்ளு தமிழ் நூல் உதவிசெய்தது எல்லாம் உள்ளது அன்றோ
சந்திரனே புன்னைவனத் தாடாளா பேரறிவாம்
புந்தியினில் வித்தை விரும்பு

#101
** வீடுபெற நில் ஜனகன் கதை
நிலையா உடல் பொருள் நீரில் நிறை கஞ்ச
மலர் இலை போல் எத்தனை நாள் வாழ்ந்தும் இலகு பொருள்
பத்தி ஒன்றும் புன்னைவனப் பண்பா சனகனைப் போல்
நித்தியமாம் வீடு பெற நில்

#102
** உத்தமனா யிரு வியாசர், விதுரர், வதிஷ்டர் ஆகியவரின் கதைகள்
வேத வியாசன் விதுரன் உருப்பசி-தன்
காதல் மைந்தனான கன வதிட்டன் நீதியைப் பார்
நேயத்தால் புன்னைவன நீதிபரா தாரணியி
லே உத்தமனாய் இரு

#103
** ஊருடன் கூடிவாழ்
ஊரும் தாயும் சரியே ஊரை அன்றியே தனி வாழ்ந்
தாரும் தாயைத் தனி வாழ்ந்தாரும் ஒப்பார் பாரின்-பால்
பொன் ஊரும் புன்னைவன பூபாலா நீ இது எண்ணி
மன் ஊருடன் கூடி வாழ்

#104
** வெட்டெனப் பேசேல் சிசுபாலன் கதை
தருமர் உயர் வேள்வி-தனில் சிசுபாலன் பார்த்து
அரியை நிந்தை சொல்லி அழிந்தான் தெரிவது அன்றோ
பார் புகழும் புன்னைவனப் பார்த்திபா மேலோரைச்
சீர்மை தப்பி வெட்டெனப் பேசேல்

#105
** வேண்டுவினை செய் இடைக்காடர் கதை
ஆடு அரசா வேந்து ஆடா ஆம் குடிசை வாசமதாத்
தேடும் இடைக்காடர் முன்பு செய்தது பார் நீடு அழகு
சார்ந்த புகழ்ப் புன்னைவனத் தாடாளா நன்றாகத்
தேர்ந்துகொண்டு வேண்டு வினை செய்
* நீடு மிகுந்த

#106
** வைகறைத் துயிலெழு
செய்ய முகம் வாய் கை கால் தேக சுத்திசெய்து மெய்யில்
துய்ய வெண் நீறு இட்டு அரனைத் தோத்திரம்செய்து உய்யும் வகை
மா எய்தும் புன்னைவன மன்னவா மை இரவிலே
வைகறைத் துயில் எழு

#107
** ஒன்னாரைத் தேறேல்
தொழுத கையுள்ளும் படை ஒடுங்கும் ஒன்னார்
அழுத கண்ணீரும் அனைத்து என்று எழு சொலைப் பார்
தூய புகழ்ப் புன்னைவனத் தோன்றலே சொப்பனத்தி
லேயும் ஒன்னாரைத் தேறேல்

#108
** ஓதுவது வேதம்
அந்தணர்கள் வாழி அறம் வாழி கீர்த்தி நிலை
தந்தவர்கள் வாழி தவம் வாழி சந்ததமும்
மானபரா புன்னைவன நாதா இவ் வகையே
தான் ஓதுவது வேதம்
** ஆத்திசூடி வெண்பா முற்றும்
**