| | |
| #26 மருதம்
பாண்டியன் கானப்பேரெயில் தந்த உக்கிரப்பெருவழுதி | #26 மருதம் பாண்டியன்
கானப்பேரெயில் தந்த உக்கிரப்பெருவழுதி |
| கூன் முள்
முள்ளி குவி குலை கழன்ற | வளைவான முள்ளை உடைய
முள்ளிச் செடியின் குவிந்த குலையிலிருந்து கழன்று விழுந்த |
| மீன் முள் அன்ன
வெண் கால் மா மலர் | மீனின் முள்ளைப் போன்ற
வெண்ணிற காம்புகளையுடைய கரிய மலர்களை, |
| பொய்தல் மகளிர்
விழவு அணி கூட்டும் | விளையாட்டு மகளிர்
தமது திருவிழா ஆட்டத்துக்கு அழகுசெய்ய எடுத்துச் சேர்க்கும் |
| அம் வயல்
நண்ணிய வளம் கேழ் ஊரனை | அழகிய வயல்களை
அருகில்கொண்ட வளம் மிகுந்த ஊரனாகிய தலைவனைக் |
| புலத்தல்
கூடுமோ தோழி அல்கல்
5 | கோபித்துக்கொள்ள
முடியுமா?, தோழியே! ஒவ்வொரு நாளும், |
| பெரும் கதவு
பொருத யானை மருப்பின் | பெரிய கோட்டைக்
கதவினைக் குத்தித் தாக்கிய யானையின் தந்தங்களில் உள்ள |
| இரும்பு செய்
தொடியின் ஏர ஆகி | இரும்பாலான (கரிய)
வளையத்தைப் போன்ற அழகினை உடையதாகி, |
| மா கண் அடைய
மார்பு_அகம் பொருந்தி | கரிய கண்களை உடைய (என்
கொங்கைகளைத் தன்)மார்பகத்தில் சேர்த்து |
| முயங்கல்
விடாஅல் இவை என மயங்கி | (முற்றிலும்)
முயங்குவதைத் தடுக்கின்றன இவை என்று கூற, தடுமாறி |
| யான் ஓம்
என்னவும் ஒல்லார் தாம் மற்று
10 | நான் “விடும்” என்று
கூறவும் உடன்படாராய், தாம் மேலும் |
| இவை பாராட்டிய
பருவமும் உளவே இனியே | இவற்றைப் பாராட்டிய
காலங்களும் உண்டு; இப்பொழுதோ, |
| புதல்வன்
தடுத்த பாலொடு தடைஇ | புதல்வனுக்கே
திகட்டும் பாலுடன் சரிந்து |
| திதலை அணிந்த
தேம் கொள் மென் முலை | அழகுத் தேமலை அணிந்த
இனிமை கொண்ட மெல்லிய கொங்கைகள் |
| நறும் சாந்து
அணிந்த கேழ் கிளர் அகலம் | மணமிக்க சந்தனம்
அணிந்த நிறம் விளங்கும் (தலைவனின்) மார்பில், |
| வீங்க முயங்கல்
யாம் வேண்டினமே 15 | விம்மும்படி
முயங்குதலை நான் விரும்பினேனாகவும், |
| தீம் பால்
படுதல் தாம் அஞ்சினரே ஆயிடை | இனிய பால் (தன்
மார்பில்) படுதலை அவர் அஞ்சினார்; அப்போது, |
| கவவு கை
நெகிழ்ந்தமை போற்றி மதவு நடை | (முன்பு இறுக)அணைத்த
கை (இப்போது) நெகிழ்ந்ததைக் கண்டு, ஆர்வ நடையுள்ள |
| செவிலி கை என்
புதல்வனை நோக்கி | செவிலியின் கையிலுள்ள
என் புதல்வனை நோக்கி |
| நல்லோர்க்கு
ஒத்தனிர் நீயிர் இஃதோ | (என்னைக்
காட்டிலும்)நன்றாக இருப்போரிடம் ஒத்துப்போவீர் நீவிர், இதோ |
| செல்வற்கு
ஒத்தனம் யாம் என மெல்ல என்
20 | (என்)செல்வனுடன்
சேர்ந்துகொள்கிறேன் நான் எனறு சொல்லி, மெதுவாக என் |
| மகன்_வயின்
பெயர்தந்தேனே அது கண்டு | மகனிடத்திற்குச்
சென்றேன்; அதைப் பார்த்து, |
| யாமும் காதலம்
அவற்கு என சாஅய் | நானும்
விருப்பமுடையேன் அவனிடம் எனப் பணிந்து |
| சிறுபுறம்
கவையினன் ஆக உறு பெயல் | (என்) முதுகினைச்
வளைத்து அணைத்துக்கொண்டாராக, மிகுந்த மழையின் |
| தண் துளிக்கு
ஏற்ற பல உழு செம் செய் | குளிர்ந்த துளிகளை
ஏற்றுக்கொண்ட, பல முறை உழுத செங்காட்டின் |
| மண் போல்
நெகிழ்ந்து அவன் கலுழ்ந்தே
25 | மண் போல நெகிழ்ந்து
அவனுக்காகக் கலங்கிப்போய் |
| நெஞ்சு
அறைபோகிய அறிவினேற்கே | நெஞ்சழிந்துபோன
அறிவினை உடைய என்னால் – (கோபித்துக்கொள்ள முடியுமா?) |
| | |
| #27 பாலை
மதுரைக்கணக்காயனார் | #27 பாலை
மதுரைக்கணக்காயனார் |
| கொடு வரி இரும்
புலி தயங்க நெடு வரை | வளைந்த வரிகளையுடைய
பெரிய புலி இருக்குமிடம் தெரியும்படியாக, நீண்ட மலையில் |
| ஆடு கழை இரு
வெதிர் கோடைக்கு ஒல்கும் | ஆடுகின்ற தண்டினைக்
கொண்ட வலுவான கல்மூங்கில்கள் மேல்காற்றினால் வளையும் |
| கானம் கடிய
என்னார் நாம் அழ | காட்டு வழி கடினமானது
என்னாமல்; நம்மை அழவிட்டு, |
| நின்றது இல்
பொருள்_பிணி சென்று இவண் தரும்-மார் | நிலையற்ற செல்வத்தின்
மீது கொண்ட ஆசையினால் சென்று, இங்கு திரட்டிக் கொணரச் |
| செல்ப என்ப
என்போய் நல்ல 5 | செல்கிறார் என்று
சொல்கிறார்கள் என்கிறாயே, நல்ல |
| மடவை மன்ற நீயே
வட_வயின் | பேதைப்பெண் நீ,
வடக்கிலிருக்கும் |
| வேங்கடம் பயந்த
வெண் கோட்டு யானை | வேங்கடமலையில் பிடித்த
வெண்மையான தந்தங்களையுடைய யானைப்படையுள்ள, |
| மற போர்
பாண்டியர் அறத்தின் காக்கும் | வீரப் போர் புரியும்
பாண்டியர், அறநெறியில் காக்கும் |
| கொற்கை அம்
பெரும் துறை முத்தின் அன்ன | கொற்கை என்ற அழகிய
பெரிய துறைநகரில் விளையும் முத்தைப் போன்ற, |
| நகை பொலிந்து
இலங்கும் எயிறு கெழு துவர் வாய் 10 | முறுவலால் பொலிவுடன்
விளங்கும் பற்கள் உள்ள சிவந்த உன் வாய் |
| தகைப்ப தங்கலர்
ஆயினும் இகப்ப | தடுத்து நிறுத்தினால்
வெளியில் சென்று தங்கமாட்டார் – எனினும், மீறிச்செல்ல |
| யாங்ஙனம்
விடுமோ மற்றே தேம் பட | எப்படி விட்டுவிடும்
பார்ப்போம். இனிமை சொட்ட, |
| தெண் நீர்க்கு
ஏற்ற திரள் கால் குவளை | தெளிந்த நீருக்கு ஏற்ற
திரண்ட கால்களை உடைய குவளையின் |
| பெருந்தகை
சிதைத்தும் அமையா பருந்து பட | பேரழகைப் பழிக்கும்
வகையில் இருந்தும் அமையாது, பருந்துகள் வட்டமிட |
| வேத்து அமர்
கடந்த வென்றி நல் வேல் 15 | மன்னர்களைப் போரில்
வென்ற வெற்றியை உடைய நல்ல வேல் |
| குருதியொடு
துயல்வந்து அன்ன நின் | குருதியுடன் ஆடுவது
போன்ற உன் |
| அரி வேய்
உண்கண் அமர்த்த நோக்கே | செவ்வரி படர்ந்த
மையுண்ட கண்களின் மாறுபட்ட பார்வை – |
| | |
| #28 குறிஞ்சி
பாண்டியன் அறிவுடைநம்பி | #28 குறிஞ்சி
பாண்டியன் அறிவுடைநம்பி |
| மெய்யின் தீரா
மேவரு காமமொடு | எவ்வளவு நேரம்
ஒன்றுசேர்ந்து இருந்தாலும் குறைவுபடாமலும் இயைந்தும் உள்ள விருப்பத்துடன் |
| எய்யாய்
ஆயினும் உரைப்பல் தோழி | தளர்ந்துபோக மாட்டாய்
எனினும் (ஒன்று) சொல்வேன், தோழி! |
| கொய்யா
முன்னும் குரல் வார்பு தினையே | கொய்வதற்கு முன்னரேயே
கதிர்கள் தினையை உதிர்க்க ஆரம்பித்துவிட்டன. |
| அருவி ஆன்ற
பைம் கால்-தோறும் | நீர் அற்ற பசிய
பயிர்கள் எல்லாம் |
| இருவி தோன்றின
பலவே நீயே 5 | வெறும் தட்டைகளாய்ப்
ஆகிவிட்டன, பல இடங்களில் – நீதான் |
| முருகு
முரண்கொள்ளும் தேம் பாய் கண்ணி | பலவகையான மணங்களும்
கமழும் தேன் ஒழுகும் தலைமாலையை உடைய, |
| பரியல் நாயொடு
பன் மலை படரும் | விரைந்து ஓடும் வேட்டை
நாயுடன் பல மலைகளையும் கடந்து செல்லும் |
| வேட்டுவன்
பெறலொடு அமைந்தனை யாழ நின் | வேட்டைக்காரனைப்
பெறுவது ஒன்றே போதுமென்று இருக்கிறாய்! உனது |
| பூ கெழு தொடலை
நுடங்க எழுந்து_எழுந்து | பூக்கள் சிறந்த மாலை
அசைய, அடிக்கடி எழுந்து சென்று |
| கிள்ளை தெள்
விளி இடையிடை பயிற்றி 10 | கிளிகளை விரட்டும்
தெளிந்த ஓசையை அவ்வப்போது எழுப்பி, |
| ஆங்காங்கு
ஒழுகாய் ஆயின் அன்னை | அங்கங்கே சென்று
வராவிட்டால், நம் அன்னை |
| சிறு கிளி
கடிதல் தேற்றாள் இவள் என | சிறிய கிளிகளை
விரட்டுவதற்கு இவள் சரிப்பட்டுவரமாட்டாள் என எண்ணி |
| பிறர் தந்து
நிறுக்குவள் ஆயின் | வேறு சிலரை இங்கே
கொண்டுவந்து நிறுத்திவிடுவாள் – அப்படியாயின் |
| உறற்கு அரிது
ஆகும் அவன் மலர்ந்த மார்பே | (நீ) அடைவதற்கு
அரிதாய்ப்போய்விடும் அவனது அகன்ற மார்பு. |
| | |
| #29 பாலை
வெள்ளாடியனார் | #29 பாலை
வெள்ளாடியனார் |
| தொடங்கு வினை
தவிரா அசைவு இல் நோன் தாள் | தொடங்கிய வினையைக்
கைவிடாத – தளர்ச்சியற்ற – வலிமையான முயற்சியை உடைய – |
| கிடந்து உயிர்
மறுகுவது ஆயினும் இடம் படின் | (படுத்துக்)கிடந்து
உயிர் வருந்தினாலும், (தான் தாக்கி) இடப்பக்கம் சாய்ந்து |
| வீழ் களிறு
மிசையா புலியினும் சிறந்த | விழுந்த களிறை உண்ணாத
புலியைக் காட்டிலும் சிறந்த, |
| தாழ்வு இல்
உள்ளம் தலைத்தலை சிறப்ப | தாழ்வுணர்ச்சி இல்லாத
உள்ளம் மென்மேலும் மிகுந்து விளங்க, |
| செய்_வினைக்கு
அகன்ற_காலை எஃகு உற்று 5 | பொருளீட்டும்
செயலுக்குப் பிரிந்து சென்ற நேரத்தில், – ‘கத்தியால் வெட்டுப்பட்டு |
| இரு வேறு ஆகிய
தெரி_தகு வனப்பின் | இரண்டு பகுதியாக ஆன,
நன்கு புலனாகும் அழகினையுடைய |
| மாவின் நறு வடி
போல காண்-தொறும் | மாவின் நறும் பிஞ்சு
போல, காணுந்தோறும் |
| மேவல் தண்டா
மகிழ் நோக்கு உண்கண் | ஆசை குறையாத மகிழ்ந்த
நோக்கினை உடைய மைதீட்டிய கண்களை |
| நினையாது
கழிந்த வைகல் எனையதூஉம் | நினையாது கழிந்த
நாளில் சிறிதுநேரங்கூட |
| வாழலென் யான்
என தேற்றி பல் மாண் 10 | வாழமாட்டேன் நான்’ –
என்று ஆறுதல் கூறி பல்வேறு மாண்புகளும் |
| தாழ கூறிய தகை
சால் நன் மொழி | தாழ்ந்துபோகும்படி
கூறிய உயர்வான நல்ல சொற்களை |
| மறந்தனிர்
போறிர் எம் என சிறந்த நின் | மறந்துவிட்டீர் போலத்
தோன்றுகிறீர் எனக்கு” எனச் சிறந்த உனது |
| எயிறு கெழு
துவர் வாய் இன் நகை அழுங்க | பற்கள் சிறந்து
விளங்கும் பவள வாயில் இனிய புன்னகை கெடும்படியாகக் |
| வினவல் ஆனா
புனை_இழை கேள் இனி | கேட்டுக்கொண்டே
இருக்கிறாயே, அழகிய அணிகளை உடையவளே! கேட்பாயாக, இப்போது |
| வெம்மை தண்டா
எரி உகு பறந்தலை 15 | வெம்மை குறையாத
நெருப்பு கொட்டும் பாழ்நிலத்தில் |
| கொம்மை வாடிய
இயவுள் யானை | (தன் உடல்) பருமன்
வற்றிப்போன தலைமைப் பொறுப்புள்ள யானை |
| நீர் மருங்கு
அறியாது தேர் மருங்கு ஓடி | நீர் இருக்குமிடம்
அறியாது, கானல்நீர் தோன்றுமிடமெல்லாம் ஓடி, |
| அறு நீர்
அம்பியின் நெறி முதல் உணங்கும் | வற்றிப்போன ஆற்றில்
உள்ள ஓடத்தைப் போல, வழிநடுவே வாடிக்கிடக்கும், |
| உள்ளுநர்
பனிக்கும் ஊக்கு அரும் கடத்து இடை | நினைத்துப்பார்ப்பவரையும்
நடுக்கும் ஊக்கம் அழிக்கும் வறும் காட்டினில் |
| எள்ளல் நோனா
பொருள் தரல் விருப்பொடு 20 | (பிறர்) இகழ்வதைப்
பொறுக்காத பொருளீட்டும் விருப்பத்துடன் |
| நாணு தளை ஆக
வைகி மாண் வினைக்கு | மான உணர்வு
கட்டிப்போட்டதனால் தங்கி, மாண்புள்ள வினை காரணமாக |
| உடம்பு ஆண்டு
ஒழிந்தமை அல்லதை | (என்)உடம்பு அங்கு
இருந்ததே ஒழிய |
| மடம் கெழு
நெஞ்சம் நின் உழையதுவே | பேதைமை உள்ள (என்)
நெஞ்சம் உன் அருகிலேயேதான் இருந்தது. |
| | |
| #30 நெய்தல்
முடங்கி கிடந்த நெடுஞ்சேரலாதன் | #30 நெய்தல் முடங்கி
கிடந்த நெடுஞ்சேரலாதன் |
| நெடும் கயிறு
வலந்த குறும் கண் அம் வலை | நீண்ட கயிற்றில்
கட்டப்பட்ட சிறிய கண்களையுடைய அழகிய வலையில் |
| கடல் பாடு அழிய
இன மீன் முகந்து | கடலின் பெருமை அழிய
மீன்களை முகந்து |
| துணை புணர்
உவகையர் பரத மாக்கள் | துணையுடன் கூடிய
மகிழ்ச்சியுடையோரான மீனவ மக்கள் |
| இளையரும்
முதியரும் கிளையுடன் துவன்றி | இளையரும்
முதியருமாய்ச் சுற்றத்துடன் கூடி |
| உப்பு ஒய்
உமணர் அரும் துறை போக்கும் 5 | உப்பைக்
கொண்டுசெல்லும் உமணர் அரிய துறைகளில் செலுத்தும் |
| ஒழுகை நோன்
பகடு ஒப்ப குழீஇ | வரிசை வண்டிகளின் வலிய
காளைகளைப் போலக் குழுமி |
| அயிர் திணி
அடைகரை ஒலிப்ப வாங்கி | நுண்மணல் செறிவாக
அடைந்துள்ள கரையில் ஆரவாரத்துடன் இழுத்து |
| பெரும் களம்
தொகுத்த உழவர் போல | பெரிய களத்தில்
(நெல்லைக்)குவித்துவைத்த உழவர் போல |
| இரந்தோர் வறும்
கலம் மல்க வீசி | இரப்போரின் வெறும்
கலன்களில் நிறையச் சொரிந்து |
| பாடு பல
அமைத்து கொள்ளை சாற்றி 10 | பல கூறுகளாகச் செய்து
தாம் கொண்டவற்றை விலைகூறி விற்று |
| கோடு உயர் திணி
மணல் துஞ்சும் துறைவ | கரை உயர்ந்த திண்ணிய
மணற்பரப்பில் தூங்கும் தலைவனே! |
| பெருமை என்பது
கெடுமோ ஒரு நாள் | நின் பெருமை என்பது
குறைந்துபோகுமோ? ஏதேனும் ஒரு நாளில் |
| மண்ணா முத்தம்
அரும்பிய புன்னை | கழுவப்படாத
முத்துக்கள் (போல) அரும்பியிருக்கும் புன்னையின் |
| தண் நறும்
கானல் வந்து நும் | குளிர்ந்த மணங்கமழும்
கடற்கரைச் சோலையில் வந்து, “உம் |
| வண்ணம் எவனோ
என்றனிர் செலினே 15 | அழகு எப்படி
இருக்கிறது?” என்றவராய்க் கேட்டுவிட்டுப் போனால். |
| | |
| | |
| #31 பாலை
மாமூலனார் | #31 பாலை மாமூலனார் |
| நெருப்பு என
சிவந்த உருப்பு அவிர் மண்டிலம் | தீயைப்போலச் சினந்து
விளங்கும் வெம்மை ஒளிரும் ஞாயிறு |
| புலம்_கடை
மடங்க தெறுதலின் ஞொள்கி | விளைநிலங்களின்
கடைசிமட்டும் கருகிப்போகத் தக்கதாகச் சுட்டுப்பொசுக்குவதால் சுருங்கிப்போய் |
| நிலம்
புடைபெயர்வது அன்று-கொல் இன்று என | நிலம் (வெடித்து)
நிலைபெயருமோ இன்று என |
| மன் உயிர்
மடிந்த மழை மாறு அமையத்து | உலகத்து உயிர்கள்
மடிந்துபோக மழை அற்றுப்போன இக் காலத்தில் |
| இலை இல ஓங்கிய
நிலை உயர் யாஅத்து 5 | இலைகள் இல்லாதுபோய்,
நிமிர்ந்த நிலையில் உயர்ந்து நிற்கும் யா மரத்தின் |
| மேல் கவட்டு
இருந்த பார்ப்பு_இனங்கட்கு | உச்சிக் கவட்டில்
இருந்த தன் குஞ்சுகளுக்கு |
| கல் உடை
குறும்பின் வயவர் வில் இட | கல்லை உடைய சிற்றரணில்
இருக்கும் மறவர்கள் வில்லால் (அம்பினை) எய்ய |
| நிண வரி
குறைந்த நிறத்த அதர்-தொறும் | நிணம் ஒழுகும்
பொலிவற்ற நிறமுள்ள வழிகள்தோறும் |
| கணவிர மாலை
இடூஉ கழிந்து அன்ன | செவ்வலரி மாலை
இட்டவாறு இறந்துகிடந்தாற் போல |
| புண் உமிழ்
குருதி பரிப்ப கிடந்தோர் 10 | புண் சொரியும் குருதி
சூழ்ந்து பரவக் கிடந்தோரின் |
| கண் உமிழ்
கழுகின் கானம் நீந்தி | கண்களை (க் கொத்திச்
சென்று) ஊட்டிவிடும் கழூகுகளையுடைய காட்டைக் கடந்து |
| சென்றார் என்பு
இலர் தோழி வென்றியொடு | சென்றார் என்று
கூறுபவர் இலர், தோழி! வெற்றியோடு |
| வில் அலைத்து
உண்ணும் வல் ஆண் வாழ்க்கை | வில்லால்
(பகைவரை)அழித்து (அவரின் செல்வத்தைத்)துய்க்கும் வலிய ஆண்மையுள்ள வாழ்க்கை உடைய |
| தமிழ் கெழு
மூவர் காக்கும் | தமிழ்நாட்டினை ஆளும்
மன்னர் மூவரும் காக்கும் |
| மொழிபெயர்
தேஎத்த பன் மலை இறந்தே 15 | தமிழ் மொழியின் வேறான
மொழிவழங்கும் தேயங்களின் பல மலைகளையும் கடந்து. |
| | |
| #32 குறிஞ்சி
நல்வெள்ளியார் | #32 குறிஞ்சி
நல்வெள்ளியார் |
| நெருநல் எல்லை
ஏனல் தோன்றி | நேற்றுப் பகலில்
தினைப்புனத்தில் தோன்றி, |
| திரு மணி
ஒளிர்வரும் பூணன் வந்து | அழகிய மணிகள் ஒளிரும்
அணிகளைப் பூண்டவனாய் வந்து, |
| புரவலன் போலும்
தோற்றம் உறழ் கொள | அரசன் போன்ற
(தனது)தோற்றத்துக்கு மாறாக |
| இரவல்
மாக்களின் பணிமொழி பயிற்றி | இரத்தல் செய்யும்
மக்களைப் போல பணிவான சொற்களைப் பலமுறை கூறி, |
| சிறுதினை படு
கிளி கடீஇயர் பன் மாண் 5 | “சிறுதினையில் படியும்
கிளிகளைக் விரட்டுவதற்கு, பலவிதமான உயர்ந்த |
| குளிர் கொள்
தட்டை மதன் இல புடையா | குளிருடன் கூடிய
தட்டைகளை வலுவில்லாமல் அடித்துக்கொண்டு, |
| சூர்
அர_மகளிரின் நின்ற நீ மற்று | சூர்கொண்ட தெய்வமகளிர்
போல நிற்கின்ற நீ |
| யாரையோ எம்
அணங்கியோய் உண்கு என | யாரோ, என்னை
வருத்துகின்றவளே, (உன்னை)விழுங்கட்டுமா?” என்று |
| சிறுபுறம்
கவையினன் ஆக அதன் கொண்டு | என் பின்கழுத்தை
வளைத்துப் பிடித்தவனாக, அதன் காரணமாகக் |
| இகு பெயல்
மண்ணின் ஞெகிழ்பு அஞர் உற்ற என்
10 | கொட்டும் மழை பெய்த
மண்ணைப்போல நெகிழ்ந்து வருந்திய என் |
| உள் அவன்
அறிதல் அஞ்சி உள் இல் | உள்ளத்தை அவன் அறிதலை
அஞ்சி, (என்)உள்ளத்தில் இல்லாத |
| கடிய கூறி
கைபிணி விடாஅ | கடுஞ்சொற்களைக் கூறி
(அவனது) கையின் பிணைப்பினை விடுவித்து |
| வெரூஉம் மான்
பிணையின் ஒரீஇ நின்ற | வெருளும் பெண்மானைப்
போல் விலகி நின்ற |
| என் உர
தகைமையின் பெயர்த்து பிறிது என்_வயின் | என் உறுதியின்
தன்மையினால் (அவன்)தன்னிலைக்கு வந்து, வேறு என்னிடம் |
| சொல்ல
வல்லிற்றும் இலனே அல்லாந்து
15 | சொல்ல வலுவுள்ள
சொற்கள் எதுவும் இல்லாதவனாய், அலமந்து |
| இனம் தீர்
களிற்றின் பெயர்ந்தோன் இன்றும் | (தன்)கூட்டத்திலிருந்து
நீங்கும் களிற்றைப் போல் சென்றவன், இன்றைக்கும் |
| தோலாவாறு இல்லை
தோழி நாம் சென்மோ | தோற்காதிருத்தல்
இல்லை, தோழியே! நாம் செல்வோமாக, |
| சாய் இறை பணை
தோள் கிழமை தனக்கே | வளைந்து இறங்கும்
பெரிய (என்)தோள்களின் உரிமை தனக்கே |
| மாசு இன்று
ஆதலும் அறியான் ஏசற்று | களங்கமின்றி உடையது
என்பதையும் அறியான், வருத்தமுற்று |
| என் குறை
புறனிலை முயலும்
20 | என் தேவையை (என்னிடமே)
இரந்து நிற்க முயலும் |
| அண்கணாளனை
நகுகம் யாமே | (என்)கண் முன்னே வந்து
நிற்பவனை நகையாடுவோம் யாம். |
| | |
| #33 பாலை மதுரை
அளக்கர் ஞாழார் மகனார் மள்ளனார் | #33 பாலை மதுரை
அளக்கர் ஞாழார் மகனார் மள்ளனார் |
| வினை நன்று
ஆதல் வெறுப்ப காட்டி | பொருளீட்ட
மேற்கொள்ளவிருக்கும் செயல் நல்லது என்பதை வெகுவாக உணர்த்தி |
| மனை மாண்
கற்பின் வாள்_நுதல் ஒழிய | மனையில் இருக்கும்
சிறந்த கற்பினையுடைய ஒளிரும் நெற்றியை உடையோளைப் பிரிந்து, |
| கவை முறி இழந்த
செம் நிலை யாஅத்து | கவடுகளில் முளைவிடும்
தளிர்களும் இல்லாத, செங்குத்தாக நிற்கும் யாமரத்தின் |
| ஒன்று ஓங்கு
உயர் சினை இருந்த வன் பறை | ஒரே தண்டாக ஓங்கி
உயர்ந்த மரத்தின் (உச்சிக்) கிளையில் இருக்கும், வலிய பறத்தலையுடைய |
| வீளை பருந்தின்
கோள் வல் சேவல் 5 | சீட்டி ஒலி எழுப்பும்
பருந்தின் (இரையைக் குறிபார்த்துக்)கவர்வதில் திறமைமிக்க ஆண் பறவை |
| வளை வாய் பேடை
வரு_திறம் பயிரும் | வளைந்த வாயை உடைய
பெண்பருந்தை அழைப்பதற்காக மீண்டும் மீண்டும் ஒலிக்கும் |
| இளி தேர் தீம்
குரல் இசைக்கும் அத்தம் | இளி என்ற சுரத்தைத்
தேரும் இனிய குரல் ஒலிக்கும் அருஞ்சுரம் |
| செலவு
அரும்-குரைய என்னாது சென்று அவள் | செல்வதற்கு மிகவும்
கடினமானது என்று எண்ணாமல் பயணத்தை மேற்கொண்டு, தலைவியின் |
| மலர் பாடு ஆன்ற
மை எழில் மழை கண் | மலரின் பெருமையைக்
குலைக்கும் வகையில் அமைந்த, மையிட்ட அழகிய குளிர்ந்த கண்களின் |
| தெளியா நோக்கம்
உள்ளினை உளி வாய் 10 | தெளிவில்லாத பார்வையை
நினைத்துப்பார்க்கிறாய் – உளியின் வாயைப்போன்று (கூர்மையான) |
| வெம் பரல் அதர
குன்று பல நீந்தி | சூடான பரல்கற்களைக்
கொண்ட பாதைகளையுடைய குன்றுகள் பலவற்றைக் கடந்து, |
| யாமே எமியம் ஆக
நீயே | (இப்போது இங்கே)நான்
தனியனாய் இருக்க, (என் நெஞ்சே!) நீ மட்டும் |
| ஒழிய சூழ்ந்தனை
ஆயின் முனாஅது | (என்னை)விட்டுப் போக
எண்ணுகிறாய் என்றால், மிகப் பழமையான, |
| வெல் போர்
வானவன் கொல்லி மீமிசை | வெற்றிப்போர்களின்
சேரமன்னனின் கொல்லிமலையின் உச்சியில் உள்ள |
| நுணங்கு அமை
புரையும் வணங்கு இறை பணை தோள்
15 | சிறிய கெட்டிமூங்கில்
போன்ற வளைந்த பக்கங்களையுடைய பருத்த தோள்களையும், |
| வரி அணி
அல்குல் வால் எயிற்றோள்_வயின் | தேமலைக்கொண்ட
அல்குலையும், வெண்மையான பற்களையும் கொண்ட தலைவியைவிட்டுப் |
| பிரியாய் ஆயின்
நன்று-மன் தில்ல | பிரியாமல்
இருந்திருந்தால் நன்றாக இருந்திருக்கும், |
| அன்று நம்
அறியாய் ஆயினும் இன்று நம் | பிரிந்த நாளில்
என்னைப்பற்றி நீ சரியாக அறிந்திருக்கவில்லை. எனினும் இன்று நாம் |
| செய்_வினை
ஆற்று_உற விலங்கின் | மேற்கொண்டுள்ள பணியை
நடுவழியில் விலக்கிவைத்தால் |
| எய்துவை
அல்லையோ பிறர் நகு பொருளே
20 | அடையமாட்டாயோ, பிறர்
எள்ளி நகையாடும் நிலையை? |
| | |
| #34 முல்லை
மதுரை மருதன் இளநாகனார் | #34 முல்லை மதுரை
மருதன் இளநாகனார் |
| சிறு கரும்
பிடவின் வெண் தலை குறும் புதல் | சிறிய கரிய
பிடவஞ்செடியின் வெள்ளை நிறத் தலையை உடைய சிறிய புதர் |
| கண்ணியின்
மலரும் தண் நறும் புறவில் | தலைமாலை போல மலரும்
குளிர்ந்த மணமிக்க முல்லை நிலத்தில் |
| தொடுதோல்
கானவன் கவை பொறுத்து அன்ன | செருப்பு அணிந்த
வேட்டுவன் இரண்டாகப் பிளப்புண்ட கோலைத் தோளில் சுமப்பதைப் போல |
| இரு திரி
மருப்பின் அண்ணல் இரலை | பெரிய முறுக்குண்ட
கொம்புகளையுடைய பெருமை தங்கிய ஆண்மான்கள் |
| செறி இலை
பதவின் செம் கோல் மென் குரல் 5 | செறிவாக அமைந்த
இலைகளையுடைய அறுகம்புல்லின் சிவந்த தண்டினோடு மெல்லிய கொத்துக்களை |
| மறி ஆடு
மருங்கின் மட பிணை அருத்தி | குட்டிகள் விளையாடும்
பக்கத்தினையுடைய இளைய பெண்மானை தின்னச்செய்து |
| தெள் அறல்
தழீஇய வார் மணல் அடைகரை | தெளிவாக
அறுத்துக்கொண்டு செல்லும் நீரையொட்டிய நீண்ட மணல்சார்ந்த கரைகளில் |
| மெல்கிடு கவுள
துஞ்சு புறம் காக்கும் | அசைபோடும்
கதுப்புக்களுடன் துயில்கொள்ளும் இடத்தைக் காத்து நிற்கும் |
| பெருந்தகைக்கு
உடைந்த நெஞ்சம் ஏமுற | பெருந்தன்மையினைக்
கண்டு உடைந்துபோன நெஞ்சம் இன்பமடையும்வண்ணம் |
| செல்க தேரே நல்
வலம் பெறுந 10 | நம் தேர் விரைந்து
செல்லட்டும், நல்ல திறம்வாய்ந்த பாகனே! |
| பசை கொல் மெல்
விரல் பெரும் தோள் புலைத்தி | ஆடையில் தோய்த்த
அதிகக் கஞ்சிப்பசையை அலசும் மெல் விரல் பெரும் தோள் வண்ணார்ப்பெண், |
| துறை விட்டு
அன்ன தூ மயிர் எகினம் | ஆற்றுத்துறையில்
அலசிவிடுவது போன்ற தூய வெண்மையான மயிர்களையுடைய அன்னங்கள் |
| துணையொடு
திளைக்கும் காப்பு உடை வரைப்பில் | தம் பெடைகளுடன்
விளையாடி மகிழும் காவல் உள்ள மனையகத்தில், |
| செம் தார் பைம்
கிளி முன்கை ஏந்தி | சிவந்த மாலை அணிந்தது
போன்ற கழுத்தையுடைய பசுங்கிளியைத் தனது முன்னங்கையில் ஏந்தி, |
| இன்று வரல்
உரைமோ சென்றிசினோர் திறத்து என | நம்மைப் பிரிந்து
சென்றவரைப் பற்றி, இன்று வருவார் என்று உரைப்பாய் என்று |
| இல்லவர் அறிதல்
அஞ்சி மெல்லென 15 | வீட்டிலுள்ளவர்கள்
அறிந்துவிடுவாரோ என்று அஞ்சி மிகவும் மெதுவாக |
| மழலை இன் சொல்
பயிற்றும் | மழலையாகிய இனிய
சொற்களைத் திரும்பத்திரும்பச் சொல்லும் |
| நாண் உடை அரிவை
மாண் நலம் பெறவே | நாணம் மிக்க நம்
தலைவியின் மாண்புள்ள அழகினை நுகர்வதற்கு – |
| | |
| #35 பாலை
குடவாயில் கீரத்தனார் | #35 பாலை குடவாயில்
கீரத்தனார் |
| ஈன்று
புறந்தந்த எம்மும் உள்ளாள் | பெற்றுப் போற்றி
வளர்த்த என்னையும் மறந்துவிட்டாள்- |
| வான் தோய்
இஞ்சி நன் நகர் புலம்ப | விண்ணைத் தொடும்
உயர்ந்த மதிலையுடைய இந்த நல் மனை தனிமையுற்றது; |
| தனி மணி
இரட்டும் தாள் உடை கடிகை | தனித்த ஒரு மணி
மாறிமாறி ஒலிக்கும், பொருத்துதல் உள்ள கழுத்துப்பட்டை உடைய – |
| நுழை நுதி நெடு
வேல் குறும் படை மழவர் | கூரிய முனை கொண்ட
நீண்ட வேலை உடைய சிற்றரண் மழவர்கள் (ஓட்டிச் சென்ற) – |
| முனை ஆ தந்து
முரம்பின் வீழ்த்த 5 | போரிட்டு மீட்ட –
பசுக்களைக் கொணர்ந்து, (அந்த மழவர்களை) மேட்டுநிலத்தில் வீழ்த்திய |
| வில் ஏர்
வாழ்க்கை விழு தொடை மறவர் | வில்லையே ஏராகக் கொண்ட
வாழ்க்கையை உடைய, சிறப்பாக அம்பு எய்யும் மறவர்கள் |
| வல் ஆண்
பதுக்கை கடவுள் பேண்-மார் | தம் வலிய ஆண்மையின்
சின்னமான பதுக்கைக் கடவுளை வழிபடுவதற்கு |
| நடுகல் பீலி
சூட்டி துடிப்படுத்து | அந்த நடுகல்லில்
மயில்தோகைகளை அணிவித்து, உடுக்கு அடித்து, |
| தோப்பி கள்ளொடு
துரூஉ பலி கொடுக்கும் | நெல்லால் ஆக்கிய
கள்ளோடு செம்மறியாட்டையும் பலி கொடுக்கும் |
| போக்கு அரும்
கவலைய புலவு நாறு அரும் சுரம் 10 | செல்வதற்கு இயலாத
கவர்த்த வழிகளையுடைய புலால் நாறும் அரிய சுரநெறியில் |
| துணிந்து பிறள்
ஆயினள் ஆயினும் அணிந்து_அணிந்து | துணிவுடன் சென்று
(நமக்கு) அன்னியள் ஆகிவிட்டாலும் – (அவளுக்குப்) பலவித அணிகளை அணிந்து |
| ஆர்வ நெஞ்சமொடு
ஆய் நலன் அளைஇ தன் | ஆர்வமுள்ள நெஞ்சமோடு
அவளது அழகிய நலனைத் துய்த்துத் தன்னுடைய |
| மார்பு துணை ஆக
துயிற்றுக தில்ல | மார்பே துணையாக அவளைத்
துயில்விப்பானாக – |
| துஞ்சா முழவின்
கோவல் கோமான் | ஓயாது ஒலிக்கும் முரசை
உடைய, திருக்கோவலூருக்குத் தலைவனான, |
| நெடும் தேர்
காரி கொடுங்கால் முன்துறை 15 | நெடிய தேரைக் கொண்ட
காரியின் கொடுங்கால் என்னும் இடத்தின் முன்துறையில் உள்ள |
| பெண்ணை அம்
பேரியாற்று நுண் அறல் கடுக்கும் | பெண்ணை ஆகிய அழகிய
பெரிய ஆற்றின் நுண்ணிய கருமணலைப் போன்ற |
| நெறி இரும்
கதுப்பின் என் பேதைக்கு | நெளிந்த கரிய கூந்தலை
உடைய என் பேதைமகளுக்கு |
| அறியா தேஎத்து
ஆற்றிய துணையே | அறியாத நாட்டில்
அவளைக் கூட்டிச் சென்ற துணைவன். |
| | |
| #36 மருதம்
மதுரை நக்கீரர் | #36 மருதம் மதுரை
நக்கீரர் |
| பகு வாய்
வராஅல் பல் வரி இரும் போத்து | பிளந்த வாயையுடைய
வராலின், பல வரிகளைக் கொண்ட ஆண்மீன் |
| கொடு வாய்
இரும்பின் கோள் இரை துற்றி | வளைந்த வாயையுடைய
தூண்டில்முள்ளில் மாட்டிய இரையை விழுங்கி, |
| ஆம்பல் மெல்
அடை கிழிய குவளை | ஆம்பலின் மெல்லிய இலை
கிழியுமாறு, குவளையின் |
| கூம்பு விடு
பன் மலர் சிதைய பாய்ந்து எழுந்து | மலர்கின்ற பல மலர்கள்
சிதைந்துபோகப் பாய்ந்து எழுந்து, |
| அரில் படு
வள்ளை ஆய் கொடி மயக்கி 5 | பின்னிக்கிடக்கும்
வள்ளையின் அழகிய கொடிகளை உழப்பி, |
| தூண்டில்
வேட்டுவன் வாங்க வாராது | தூண்டில்காரன் வளைத்து
இழுக்க வராமல், |
| கயிறு இடு கத
சே போல மதம் மிக்கு | கயிறிட்டுப்
பிடிக்கும் சினம் மிக்க காளையைப் போல வெறி மிகுந்து, |
| நாள் கயம்
உழக்கும் பூ கேழ் ஊர | காலையில் குளத்தைக்
கலக்கும் பூக்கள் பொருந்திய ஊரனே! |
| வரு புனல் வையை
வார் மணல் அகன் துறை | (வற்றாது) வரும் நீரை
உடைய வைகையின் நீண்ட மணற்பரப்புள்ள அகன்ற துறையின் |
| திரு மருது
ஓங்கிய விரி மலர் காவில் 10 | அழகிய மருதமரங்கள்
ஓங்கி வளர்ந்த, விரிந்த மலர்களுள்ள சோலையில் |
| நறும் பல்
கூந்தல் குறும் தொடி மடந்தையொடு | நறிய, மிக்க
கூந்தலையுடைய, குறு வளையல்களை அணிந்த இளம்பெண்ணுடன் |
| வதுவை
அயர்ந்தனை என்ப அலரே | மணவாழ்க்கை நடத்தினாய்
என்று ஊரார் கூறுகின்றனர் – ஊரார் ஏளனப் பேச்சு, |
| கொய் சுவல்
புரவி கொடி தேர் செழியன் | கொய்த பிடரிமயிரைக்
கொண்ட குதிரைகள் பூட்டிய கொடி பறக்கும் தேர் உடைய நெடுஞ்செழியன் |
| ஆலங்கானத்து
அகன் தலை சிவப்ப | தலையாலங்கானத்து அகன்ற
போர்க்களம் செந்நிறம் அடைய – |
| சேரல்
செம்பியன் சினம் கெழு திதியன்
15 | சேரன், சோழன், சினம்
மிக்க திதியன், |
| போர் வல் யானை
பொலம் பூண் எழினி | போரில் வல்ல யானையை
உடைய பொன் அணிகள் அணிந்த எழினி, |
| நார் அரி
நறவின் எருமையூரன் | நாரால் அரிக்கப்பட்ட
கள்ளினையுடைய எருமையூரன், |
| தேம் கமழ்
அகலத்து புலர்ந்த சாந்தின் | தேன் மணம் கமழும்
மார்பினில் பூசிப் புலர்ந்த சந்தனத்தையுடைய |
| இருங்கோ
வேண்மான் இயல் தேர் பொருநன் என்று | இருங்கோவேண்மான்,
சிறப்பாகச் செய்யப்பட்ட தேரையுடைய பொருநன் என்ற |
| எழுவர் நல்
வலம் அடங்க ஒரு பகல் 20 | எழுவரின் சிறந்த
வெற்றிகள் அடங்கிப்போக, ஒரு பகலிலே |
| முரைசொடு
வெண்குடை அகப்படுத்து உரை செல | முரசுகளுடன்
வெண்கொற்றக்குடைகளையும் கைப்பற்றி, தன் புகழ் எங்கும் பரவ, |
| கொன்று களம்
வேட்ட ஞான்றை | அவரைக் கொன்று
களவேள்வி செய்த பொழுது |
| வென்றி கொள்
வீரர் ஆர்ப்பினும் பெரிதே | வெற்றியடைந்த வீர்ர்
எழுப்பிய ஆரவாரத்தினும் பெரிதாக உள்ளது. |
| | |
| #37 பாலை
விற்றூற்று மூதெயினனார் | #37 பாலை விற்றூற்று
மூதெயினனார் |
| மறந்து அவண்
அமையார் ஆயினும் கறங்கு இசை | (தலைவர்) என்னை மறந்து
வெளியூரிலேயே தங்கிவிடமாட்டாரெனினும், கறங்கும் ஒலிகளையுடைய |
| கங்குல் ஓதை
கலி மகிழ் உழவர் | பின்னிருட்டில்
ஆரவாரத்தை உடைய மிகுந்த மகிழ்ச்சியுள்ள உழவர் |
| பொங்கழி முகந்த
தா இல் நுண் துகள் | தூற்றாப் பொலியை
முகந்து தூற்ற எழும் கனமற்ற நுண்ணிய தூசுகள் |
| மங்குல் வானின்
மாதிரம் மறைப்ப | மூடுபனி வானத்தைப்
போன்று நாற்புரத்தையும் மறைக்க – |
| வைகு புலர்
விடியல் வை பெயர்த்து ஆட்டி 5 | வைகறை புலர்ந்த
விடியற்காலையில் வைக்கோலைப் பிடித்துப்போட்டு கடாவிட்டு, |
| தொழில்
செருக்கு அனந்தர் வீட எழில் தகை | வேலைக் களைப்பால்
கள்ளுண்ட மயக்கம் தீர, அழகால் மேம்பட்ட, |
| வளியொடு சினைஇய
வண் தளிர் மாஅத்து | காற்றால் கிளைத்த
கொழுவிய தளிர்களையுடைய மாமரத்தில் |
| கிளி போல் காய
கிளை துணர் வடித்து | கிளி(மூக்கு) போன்ற
காய்களைக் கொண்ட கிளை(யில் தொங்கும்) கொத்துக்களைச் சாறெடுத்து, |
| புளி_பதன்
அமைத்த புது குட மலிர் நிறை | புளிப்புச் சுவை
சேர்த்துப் புதுக்குடங்களில் விளிம்புதட்ட நிறைத்ததை, |
| வெயில் வெரிந்
நிறுத்த பயில் இதழ் பசும் குடை 10 | வெயிலில் குப்புற
நிறுத்திய மிக்க இதழ்களையுடைய பசிய (பனையோலைக்)குடையில் |
| கயம் மண்டு
பகட்டின் பருகி காண்வர | குளத்தில் நீரை
மண்டும் காளையைப் போலப் பருகி, அழகு பொருந்த |
| கொள்ளொடு பயறு
பால் விரைஇ வெள்ளி | கொள்ளும் பயறும்
பாலுடன் கலந்து, வெள்ளியால் |
| கோல் வரைந்து
அன்ன வால் அவிழ் மிதவை | கோலம் வரைந்ததைப்
போன்ற வெண்மைநிறமுள்ள நன்கு வெந்த கஞ்சியை |
| வாங்கு கை
தடுத்த பின்றை ஓங்கிய | வளைத்து உண்ட கை
தடுத்த பின்னர் – உயரமாக, |
| பருதி அம்
குப்பை சுற்றி பகல் செல
15 | சூரியனைப் போன்ற அழகான
நெற்குவியலைச் சுற்றிப் பகல் முடிய |
| மருத மர நிழல்
எருதொடு வதியும் | மருதமர நிழலில்
காளைகளுடன் தங்கியிருக்கும் |
| காமர்
வேனில்-மன் இது | விரும்பித்துய்க்கும்
வேனில் காலம் அல்லவா இது! |
| மாண் நலம்
நுகரும் துணை உடையோர்க்கே | இவ்வாறாகச் சிறப்பான
நலத்தினைத் துய்க்கும் துணையைப் பெற்றவருக்கு – |
| | |
| #38 குறிஞ்சி
வடம வண்ணக்கன் பேரிசாத்தனார் | #38 குறிஞ்சி வடம
வண்ணக்கன் பேரிசாத்தனார் |
| விரி இணர்
வேங்கை வண்டு படு கண்ணியன் | மலர்ந்த கொத்துக்களை
உடைய வேங்கைப்பூவால் செய்த, வண்டுகள் மொய்க்கும் கண்ணியன்- |
| தெரி இதழ்
குவளை தேம் பாய் தாரன் | ஆய்ந்தெடுத்த
இதழ்களையுடைய குவளை மலர்களால் ஆன தேனொழுகும் மாலையன் – |
| அம் சிலை இடவது
ஆக வெம் செலல் | அழகிய வில் இடக்கையது
ஆக, கடிதாய்ப் பறக்கும் |
| கணை வலம்
தெரிந்து துணை படர்ந்து உள்ளி | அம்பினை வலக்கையில்
தெரிந்துகொண்டு, காதலியை அடைய எண்ணி |
| வருதல் வாய்வது
வான் தோய் வெற்பன் 5 | வருவது
(இன்றும்)நடக்கும் – அந்த வானளாவிய மலைநாட்டவன் |
| வந்தனன் ஆயின்
அம் தளிர் செயலை | (இன்று)அவ்வாறு
வந்தால், அழகிய தளிர்களை உடைய அசோக மரத்தின் |
| தாழ்வு இல்
ஓங்கு சினை தொடுத்த வீழ் கயிற்று | தாழ்வாக இல்லாமல்
நீண்டிருக்கும் கிளையில் கட்டிய, கீழிறங்கும் கயிற்றின் |
| ஊசல் மாறிய
மருங்கும் பாய்பு உடன் | ஊஞ்சல் இல்லாமல்போன
இடத்தையும், (நீரில்)பாய்ந்து ஒன்றாக |
| ஆடாமையின்
கலுழ்பு இல தேறி | விளையாடாததினால்
கலங்கல் இல்லாமல் தெளிந்து, |
| நீடு இதழ்
தலைஇய கவின் பெறு நீலம்
10 | நீளமான இதழ்களைக்
கொண்ட அழகுபெற்ற நீலப்பூக்கள் |
| கண் என மலர்ந்த
சுனையும் வண் பறை | கண் போல
மலர்ந்துகிடக்கும் சுனையையும், வளவிய சிறகுகளையுடைய |
| மட கிளி
எடுத்தல் செல்லா தட குரல் | இளங்கிளிகள் தூக்கிச்
செல்ல முடியாத பெரிய கதிர்களின் |
| குலவு பொறை
இறுத்த கோல் தலை இருவி | வளைந்த பாரத்தை
அறுத்துவிட்ட தட்டைகளே தலையாய்க் கொண்ட அரிதாள்களைக்கொண்ட |
| கொய்து ஒழி
புனமும் நோக்கி நெடிது நினைந்து | அறுவடை முடிந்த
தினைப்புனத்தையும் பார்த்து – நீண்ட நேரம் நினைத்துக்கொண்டே இருந்து |
| பைதலன்
பெயரலன்-கொல்லோ ஐ தேய்கு 15 | துயருற்றவனாய்த்
திரும்பிச் செல்வானல்லனோ! என் அழகு தேய்ந்துபோகட்டும்! |
| அய வெள் அருவி
சூடிய உயர் வரை | சுனையிலிருந்து வரும்
வெள்ளிய அருவியை உச்சியில் கொண்ட உயர்ந்த மலையில் |
| கூஉம் கணஃது
எம் ஊர் என | கூப்பிடுதூரத்தில்தான்
உள்ளது எம் ஊர் என்று |
| ஆங்கு அதை
அறிவுறல் மறந்திசின் யானே | அப்பொழுதே அதனை
(அவனுக்கு)அறிவுறுத்தலை மறந்துவிட்டேனே நான்! |
| | |
| #39 பாலை மதுரை
செங்கண்ணனார் | #39 பாலை மதுரை
செங்கண்ணனார் |
| ஒழித்தது
பழித்த நெஞ்சமொடு வழி படர்ந்து | செய்யலாகாது என்று
ஒழித்த கொள்கையைப் பழித்த நெஞ்சமோடு, பயணம் மேற்கொண்டு |
| உள்ளியும்
அறிதிரோ எம் என யாழ நின் | நினைத்தும் அறிந்தீரோ
என்னை என்று, உன் |
| முள் எயிற்று
துவர் வாய் முறுவல் அழுங்க | கூரிய பற்களை உடைய
சிவந்த வாயின் முறுவல் அழிய |
| நோய்
முந்துறுத்து நொதுமல் மொழியல் நின் | நோவினை ஏற்படுத்தி
அன்பற்றவற்றைப் பேசாதே – உன் |
| ஆய் நலம்
மறப்பெனோ மற்றே சேண் இகந்து 5 | தேடிநுகரும் அழகினை
மறப்பேனோ – மாட்டேனே! நெடுந்தூரம் கடந்து, |
| ஒலி கழை
பிசைந்த ஞெலி சொரி ஒண் பொறி | தழைத்த மூங்கில்கள்
உரசிக்கொண்டதால், மூங்கில்கழை சொரிந்த ஒள்ளிய தீப்பொறி |
| படு ஞெமல்
புதைய பொத்தி நெடு நிலை | மிகுந்த
சருகுகளுக்குள் விழுந்து தீ மூள, நாட்பட்ட |
| முளி புல்
மீமிசை வளி சுழற்று உறாஅ | காய்ந்துபோன புல்லின்
மீது காற்று சுழற்றிப் பரவச்செய்ய |
| காடு கவர்
பெரும் தீ ஓடு வயின் ஓடலின் | காட்டையே சூழ்ந்த
பெரும் தீ காற்றடிக்கும் பக்கமெல்லாம் பரவியதால், |
| அதர் கெடுத்து
அலறிய சாத்தொடு ஒராங்கு 10 | பாதையைத் தவறவிட்ட
வணிகக் கூட்டத்தாருடன் சேர்ந்து |
| மதர் புலி
வெரீஇய மையல் வேழத்து | செருக்குற்ற புலியைக்
கண்டு அஞ்சிய மதங்கொண்ட யானைகளின் |
| இனம்
தலைமயங்கிய நனம் தலை பெரும் காட்டு | கூட்டம் சிதறுண்டு
திரியும் அகன்ற இடத்தையுடைய பெரிய காட்டில், |
| ஞான்று தோன்று
அவிர் சுடர் மான்றால் பட்டு என | தொங்குவது போல்
தோன்றிய ஞாயிறு மயங்கி மறைந்திட – |
| கள் படர் ஓதி
நின் படர்ந்து உள்ளி | வண்டுகள் சூழும்
கூந்தலினாய்! உன்னை நாடி நினைத்து |
| அரும் செலவு
ஆற்றா ஆரிடை ஞெரேரென 15 | அரும் பயணமும்
இயலாமற்போன அந்த அரிய வழியில், ‘சட்’டென்று |
| பரந்து படு
பாயல் நவ்வி பட்டு என | படுத்துக் கண்மூடிய
தூக்கத்தில் – ஒரு பெண்மான் கண்ணிற்பட்டாற் போன்ற |
| இலங்கு வளை
செறியா இகுத்த நோக்கமொடு | மின்னும்
கைவளையல்களைச் சேர்த்து மேலிழுத்து, குனிந்த பார்வையுடன், |
| நிலம் கிளை
நினைவினை நின்ற நின் கண்டு | நிலத்தைக் காலால்
கிளறிக்கொண்டு சிந்தனைசெய்துகொண்டிருந்த உன்னைக் கண்டு |
| இன்_நகை இனையம்
ஆகவும் எம் வயின் | ‘இனிய முறுவல்
கொண்டவளே!, நான் இவ்வாறு வருந்தியிருக்கவும், என்னுடன் |
| ஊடல் யாங்கு
வந்தன்று என யாழ நின் 20 | (உனக்கு)ஊடல் எங்ஙனம்
வந்தது?’ என்று உன் |
| கோடு ஏந்து
புருவமொடு குவவு நுதல் நீவி | பக்கம் உயர்ந்த
புருவங்களுடன் திரண்டு குறுகிய நெற்றியை நீவிவிட்டு, |
| நறும் கதுப்பு
உளரிய நன்னர் அமையத்து | மணமுள்ள பக்கக்
கூந்தலைக் கோதிவிட்ட நல்ல நேரத்தில் |
| வறும் கை
காட்டிய வாய் அல் கனவின் | வெறுங்கையாய் ஆக்கிய
அந்தப் பொய்க் கனவினின்றும் |
| ஏற்று ஏக்கற்ற
உலமரல் | கண்விழித்து உள்ளம்
நலிவடைந்த துயரத்தை |
| போற்றாய்
ஆகலின் புலத்தியால் எம்மே
25 | ஏற்றுக்கொள்ளாததினால்
ஊடல்கொள்கிறாய் என்னுடன். |
| | |
| #40 நெய்தல்
குன்றியனார் | #40 நெய்தல்
குன்றியனார் |
| கானல் மாலை கழி
பூ கூம்ப | கடற்கரைச் சோலை மாலைக்
காலத்துக் கழியில் இருக்கும் பூக்கள் குவிய, |
| நீல் நிற
பெரும் கடல் பாடு எழுந்து ஒலிப்ப | நீல நிறப்
பெருங்கடலின் ஓசை மிகுந்து ஒலிக்க, |
| மீன் ஆர்
குருகின் மென் பறை தொழுதி | மீனை உண்ணும்
கொக்குகளின் குறும்பறப்புக் கூட்டம் |
| குவை இரும்
புன்னை குடம்பை சேர | திரண்ட பெரிய புன்னை
மரத்தின் கூடுகளைச் சென்றடைய, |
| அசை வண்டு
ஆர்க்கும் அல்கு_உறு_காலை 5 | (தம் கூடுகளில் வந்து
சேரும்)வண்டுகள் மிகுந்து ஒலிக்கும் அடையும்பொழுதில் |
| தாழை தளர
தூக்கி மாலை | தாழைகள் தளரும்படி
அசைத்து, மாலையில் |
| அழி_தக வந்த
கொண்டலொடு கழி படர் | நோகும்படி வந்த
கீழ்க்காற்றினால் மிகுந்த துன்பம் கொண்ட |
| காமர் நெஞ்சம்
கையறுபு இனைய | ஆசைகொண்ட நெஞ்சம்
செயலற்று வருந்த |
| துயரம் செய்து
நம் அருளார் ஆயினும் | நமக்குத் துன்பம்
விளைவித்து (அது தீர)நம்மீது அருள்கூராராயினும் |
| அறாஅலியரோ அவர்
உடை கேண்மை 10 | அற்றுப்போகாதிருப்பதாக
அவருடைய நட்பு – |
| அளி இன்மையின்
அவண் உறை முனைஇ | (அவரிடம்) கருணை
இல்லாததால் அவ்விடத்தில் தங்குதலை வெறுத்து, |
| வாரற்க தில்ல
தோழி கழனி | (திரும்பி)வராமல்
இருப்பதாக, தோழி – வயல்வெளிகளில் |
| வெண்ணெல்
அரிநர் பின்றை ததும்பும் | வெண்ணெல்லை அரிவோரின்
பின்னே நிறைந்து ஒலிக்கும் |
| தண்ணுமை வெரீஇய
தடம் தாள் நாரை | தண்ணுமைப் பறையின்
ஓசைக்கு அஞ்சிய நீண்ட கால்களையுடைய நாரை |
| செறி மடை
வயிரின் பிளிற்றி பெண்ணை
15 | செறிந்த மூட்டுவாயினை
உடைய கொம்புவாத்தியம் போல் பிளிற்றிப் பனைமரத்தின் |
| அக மடல்
சேக்கும் துறைவன் | அகமடலில் தங்கும்
கடல்துறையில் வாழும் தலைவனது |
| இன் துயில்
மார்பில் சென்ற என் நெஞ்சே | இனிய துயில்
கொள்ளத்தக்க மார்பினை எண்ணிச் சென்ற என் நெஞ்சம் – |
| | |
| | |
| | |
| | |
| | |
| #41 பாலை
குன்றியனார் | #41 பாலை குன்றியனார் |
| வைகு புலர்
விடியல் மை புலம் பரப்ப | பின்னிருட்டு புலர்ந்த
விடியல் வேளையில் எருமைகளை மேய்நிலத்திற்கு ஓட்டிவிட, |
| கரு நனை
அவிழ்ந்த ஊழ்_உறு முருக்கின் | கருஞ்சிவப்பான
அரும்புகள் தம் பிணியவிழ்ந்த மலர்ச்சியடைந்த முருக்கமரத்தின் |
| எரி மருள் பூ
சினை இன சிதர் ஆர்ப்ப | நெருப்பைப் போன்ற
பூக்களைக் கொண்ட கிளைகளில் வண்டினம் மிக்கு ஒலிக்க, |
| நெடு நெல்
அடைச்சிய கழனி ஏர் புகுத்து | நெடிய நெற்பயிர்களைச்
சேர்த்துக் கட்டிய கழினியினுள் ஏர்களை எடுத்துச்சென்று |
| குடுமி கட்டிய
படப்பையொடு மிளிர 5 | தலை குவிந்த
மண்கட்டிகளையுடைய தோட்டத்தைப் போன்று சிறந்து விளங்க |
| அரிகால்
போழ்ந்த தெரி பகட்டு உழவர் | அரிதாள்களைப் பிளந்து
உழுகின்ற, தெரிந்தெடுத்த காளைகளையுடைய உழவர்கள் |
| ஓதை தெள் விளி
புலம்-தொறும் பரப்ப | (காளைகளை
அதட்டும்)ஓசையாகிய தெளிந்த குரல் காடுகள்தோறும் பரக்க, |
| கோழ் இணர்
எதிரிய மரத்த கவினி | செழித்த பூங்கொத்துகள்
எதிர்த்துத் தோன்றிய மரங்களையுடைவாய் அழகுற்று, |
| காடு அணி கொண்ட
காண்_தகு பொழுதில் | காடு அழகு பெற்ற
காண்பதற்கினிய பொழுதில், |
| நாம் பிரி
புலம்பின் நலம் செல சாஅய்
10 | நாம் பிரிந்திட்டதன்
தனிமையால் அழகுகெட மெலிந்து |
| நம் பிரிபு
அறியா நலனொடு சிறந்த | நம் பிரிவை இதுவரை
அறியாத அழகுடன் சிறந்து விளங்கிய |
| நல் தோள் நெகிழ
வருந்தினள்-கொல்லோ | நல்ல தோள்கள்
நெகிழும்வண்ணம் வருந்துவாளோ! |
| மென் சிறை
வண்டின் தண் கமழ் பூ துணர் | மென் சிறகுடைய
வண்டுகள் உள்ள குளிர்ந்த மணங்கமழும் பூங்கொத்துகளில் உள்ள |
| தாது இன் துவலை
தளிர் வார்ந்து அன்ன | தாதுடன் கூடிய
தேன்துளி தளிரில் ஒழுகியது போல |
| அம் கலுழ் மாமை
கிளைஇய 15 | அழகு ததும்பும்
மாநிறமேனியில் கிளைத்துத்தோன்றும் |
| நுண் பல்
தித்தி மாஅயோளே | நுண்ணிய பல தேமல்
புள்ளிகளையுடைய நம் தலைவி |
| | |
| #42 குறிஞ்சி
கபிலர் | #42 குறிஞ்சி கபிலர் |
| மலி பெயல்
கலித்த மாரி பித்திகத்து | மிகுந்த மழையால்
தழைத்த மழைக்காலப் பிச்சிக் கொடியின் |
| கொயல் அரு
நிலைஇய பெயல் ஏர் மண முகை | கொய்வதற்கு முடியாத
நிலையையுடைய மழைக்கு எழுச்சிபெற்ற மணமுள்ள அரும்பின் |
| செ வெரிந்
உறழும் கொழும் கடை மழை கண் | சிவந்த பின்புறத்தைப்
போன்ற வளமையான, குளிர்ந்த கடைக்கண்ணையும் |
| தளிர் ஏர் மேனி
மாஅயோயே 5 | தளிரைப் போன்ற அழகிய
மேனியையும் உடைய மாநிறத்தவளே! |
| நாடு வறம் கூர
நாஞ்சில் துஞ்ச | நாட்டில் வறுமை மிக,
கலப்பைகள் செயலற்று இருக்க |
| கோடை நீடிய
பைது அறு காலை | கோடை நீண்ட பசுமையற்ற
காலத்தில் – |
| குன்று கண்டு
அன்ன கோட்ட யாவையும் | குன்றுகளைப் பார்த்தது
போன்ற கரைகளையுடையவும், முற்றிலும் |
| சென்று
சேக்கல்லா புள்ள உள் இல் | பறவைகள் வந்து
தங்குதல் இல்லாதனவும் ஆகிய, உள்ளே நீர் அற்ற |
| என்றூழ் வியன்
குளம் நிறைய வீசி | வெப்பமுடைய அகன்ற
குளம் நிறையும்படி மிகுதியாகக் கொட்டிப் |
| பெரும் பெயல்
பொழிந்த ஏம வைகறை 10 | பெரிய மழை பொழிந்த
இன்பமிக்க விடியற்காலத்தில் |
| பல்லோர் உவந்த
உவகை எல்லாம் | பலரும் மகிழ்ந்த
மகிழ்ச்சி எல்லாம் |
| என்னுள்
பெய்தந்தற்றே சேண் இடை | எனக்குள் பெய்ததைப்
போன்று இருக்கிறதே! நெடுந்தொலைவில் |
| ஓங்கி தோன்றும்
உயர் வரை | உயர்ந்து தோன்றும்
உயரமான மலைகளையுடைய |
| வான் தோய்
வெற்பன் வந்த மாறே | வானளாவிய மலையைச்
சேர்ந்தவன் வந்ததாலே. |
| | |
| #43 பாலை
மதுரையாசிரியர் நல்லந்துவனார் | #43 பாலை
மதுரையாசிரியர் நல்லந்துவனார் |
| கடல் முகந்து
கொண்ட கமம் சூல் மா மழை | கடல்நீரை அள்ளி எடுத்த
நிறைந்த சூல்கொண்ட கரு மேகம் |
| சுடர் நிமிர்
மின்னொடு வலன் ஏர்பு இரங்கி | ஒளி நிமிர்ந்த
மின்னலோடு வலமாக எழுந்து ஒலித்து |
| என்றூழ் உழந்த
புன் தலை மட பிடி | வெம்மையினால் வருந்திய
புல்லிய தலையை உடைய இளைய பெண்யானை |
| கை மாய்
நீத்தம் களிற்றொடு படீஇய | தன் துதிக்கை
மறையத்தக்க வெள்ளத்தில் தன் ஆண்யானையுடன் படிந்து விளையாட |
| நிலனும்
விசும்பும் நீர் இயைந்து ஒன்றி
5 | நிலமும் வானமும்
நீரால் பொருந்திச் சேர |
| குறுநீர்
கன்னல் எண்ணுநர் அல்லது | குறுநீரையுடைய நாழிகை
வட்டிலில் நாழிகை பார்ப்போர் அன்றி |
| கதிர் மருங்கு
அறியாது அஞ்சுவர பாஅய் | ஞாயிறு உள்ள பக்கம்
தெரியாது உலகமே அஞ்சிக்கிடக்கப் பரவி |
| தளி மயங்கின்றே
தண் குரல் எழிலி யாமே | நீர்த்துளிகளைக்
கொட்டியது குளிர்ந்த, முழக்கத்தையுடைய மேகங்கள் – நானோ |
| கொய் அகை
முல்லை காலொடு மயங்கி | கொய்யும்போது
துண்டிக்கப்பட்ட முல்லைமலரின் மணம் காற்றில் கலந்து |
| மை இரும் கானம்
நாறும் நறு நுதல் 10 | இருண்ட பெரிய காடு
(மணக்கின்றதைப் போல்) மணக்கும் நறிய நெற்றியையும் |
| பல் இரும்
கூந்தல் மெல் இயல் மடந்தை | செழித்த கரிய
கூந்தலையுடைய மென்மையான இயல்புடைய தலைவியின் |
| நல் எழில் ஆகம்
சேர்ந்தனம் என்றும் | நல்ல அழகுள்ள
மார்பினைச் சேர்ந்திருக்கின்றேன்; எப்போதுமே |
| அளியரோ அளியர்
தாமே அளி இன்று | (நிச்சயமாய்)
இரங்கத்தக்கவராவர் – இரக்கமின்றி |
| ஏதில்
பொருள்_பிணி போகி தம் | அயல்நாட்டுப்
பொருளீட்டும் ஆசையால் பிரிந்து சென்று தம்முடைய |
| இன் துணை
பிரியும் மடமையோரே 15 | இனிய துணையைப்
பிரியும் மடமையையுடையோர். |
| | |
| #44 முல்லை
குடவாயில் கீரத்தனார் | #44 முல்லை குடவாயில்
கீரத்தனார் |
| வந்து வினை
முடித்தனன் வேந்தனும் பகைவரும் | மேற்கொண்ட செயலான போரை
முடித்துவிட்டான் நம் வேந்தனும்; பகைவரும் |
| தம் திறை
கொடுத்து தமர் ஆயினரே | தாம் கொடுக்கவேண்டிய
கப்பத்தைச் செலுத்தி வேண்டியவர்கள் ஆகிவிட்டனர்; |
| முரண் செறிந்து
இருந்த தானை இரண்டும் | பகைமை மிகுந்திருந்த
படைகள் இரண்டும் |
| ஒன்று என
அறைந்தன பணையே நின் தேர் | ஒன்றாகிவிட்டதாக
ஒலிக்கப்பட்டது முரசு. உனது தேர் |
| முன் இயங்கு
ஊர்தி பின்னிலை ஈயாது 5 | முன்னிடத்தில்
செயல்படுகின்ற ஊர்தி – அதற்குப் பின்னடைவு ஏற்படுத்தாமல் |
| ஊர்க பாக
ஒருவினை கழிய | (விரைந்து)செலுத்துக,
பாகனே! (ஏனையோரை) விட்டு விலகியவனாய்க் கடந்துசெல்ல; |
| நன்னன் ஏற்றை
நறும் பூண் அத்தி | நன்னனும், ஏற்றை
என்பவனும், நறிய பூண்களை அணிந்த அத்தியும், |
| துன் அரும்
கடும் திறல் கங்கன் கட்டி | (பகைவர்)
நெருங்குதற்கரிய மிக்க வலிமையுடைய கங்கனும், கட்டியும், |
| பொன் அணி வல்
வில் புன்றுறை என்று ஆங்கு | பொன் அணிகலன்கள்
அணிந்த வலிய வில்லையுடைய புன்றுறையும், என்பதாக |
| அன்று அவர்
குழீஇய அளப்பு அரும் கட்டூர் 10 | முன்பு அவர்கள்
ஒன்றுகூடியிருந்த அளத்தற்கரிய சிறப்பு வாய்ந்த பாசறையில், |
| பருந்து பட
பண்ணி பழையன் பட்டு என | பருந்துகள் மேலே
சுற்றுமாறு போரிட்டுப் பழையன் இறந்தானாக, |
| கண்டது நோனான்
ஆகி திண் தேர் | அதனைக் கண்டு
பொறுக்காதவனாகி, திண்ணிய தேரையுடைய |
| கணையன் அகப்பட
கழுமலம் தந்த | கணையன் என்பானை
அகப்படுத்தி, கழுமலம் என்ற ஊரைக் கைப்பற்றிய |
| பிணையல் அம்
கண்ணி பெரும் பூண் சென்னி | பிணைப்புள்ள அழகிய
கண்ணியையும், மிகுந்த அணிகலன்களையும் அணிந்த சென்னியின் |
| அழும்பில் அன்ன
அறாஅ யாணர் 15 | அழும்பில் என்ற ஊரை
ஒத்த, குறையாத புதுவருவாயையுடைய |
| பழம் பல்
நெல்லின் பல் குடி பரவை | பழமையான பலவான
நெல்லையுடைய பல குடிப் பரப்பினை உடையதும் |
| பொங்கடி படி
கயம் மண்டிய பசு மிளை | யானைகளும் மூழ்கும்
குளங்களையும், செறிந்த பசிய காவற்காடுகளையும் (உடைய) |
| தண் குடவாயில்
அன்னோள் | குளிர்ந்த குடவாயில்
என்னும் ஊரைப் போன்றவளின் |
| பண்பு உடை
ஆகத்து இன் துயில் பெறவே | நல்ல பண்புகளையுடைய
மார்பினில் இனிய துயிலைப் பெறுவதற்கு. |
| | |
| #45 பாலை
வெள்ளிவீதியார் | #45 பாலை
வெள்ளிவீதியார் |
| வாடல்
உழுஞ்சில் விளை நெற்று அம் துணர் | உலர்ந்த
வாகைமரத்திலுள்ள விளைந்த நெற்றுக்களின் கொத்து |
| ஆடு_கள பறையின்
அரிப்பன ஒலிப்ப | ஆடுகளத்தில்
(ஒலிக்கும் கழைக் கூத்தர்களின்) பறையினைப் போல் விட்டுவிட்டு ஒலிக்கும் |
| கோடை நீடிய
அகன் பெரும் குன்றத்து | கோடைக்காலம்
நீடித்திருக்கும் அகன்ற பெரிய குன்றில் |
| நீர் இல் ஆர்
ஆற்று நிவப்பன களிறு அட்டு | நீரற்று இருக்கும்
அரிய வழியில் நிமிர்ந்துவரும் களிற்றினைக் கொன்று |
| ஆள் இல்
அத்தத்து உழுவை உகளும் 5 | போய்வருவோர் இல்லாத
கிளைவழிகளில் புலிகள் புரண்டுவிளையாடும் |
| காடு இறந்தனரே
காதலர் மாமை | பாலைக் காட்டைக்
கடந்துதான் காதலர் சென்றிருக்கிறார் — எனது மாமை நிறமானது |
| அரி நுண் பசலை
பாஅய் பீரத்து | மெல்லிய நுண்ணிய பசலை
பரத்தலால், பீர்க்கின் |
| எழில் மலர்
புரைதல் வேண்டும் அலரே | அழகிய மலரைப் போன்று
மாறிவிட்டது. ஊர்மக்கள் பேச்சோ |
| அன்னி குறுக்கை
பறந்தலை திதியன் | அன்னி என்பவன்,
குறுக்கை என்னும் போர்க்களத்தில், திதியன் என்பானின், |
| தொல் நிலை
முழு_முதல் துமிய பண்ணி
10 | நெடுங்காலம்
நின்றிருக்கும் அடிமரத்தை வெட்டச் செய்து, |
| புன்னை குறைத்த
ஞான்றை வயிரியர் | அந்தப் புன்னை மரத்தை
மொட்டையாக்கிய போது, கூத்தர்கள் |
| இன் இசை
ஆர்ப்பினும் பெரிதே யானே | (எழுப்பிய)
இன்னிசையின் ஆரவாரத்தினும் பெரிதே – நானோ, |
| காதலன் கெடுத்த
சிறுமையொடு நோய் கூர்ந்து | என் தலைவனைக்
காணாமற்போக்கிய சிறுமையால் மனநோய் மிகுந்து |
| ஆதிமந்தி போல
பேது உற்று | ஆதிமந்தி போல
பித்துப்பிடித்து |
| அலந்தனென்
உழல்வென்-கொல்லோ பொலம் தார் 15 | துயரத்துள் மூழ்கித்
திரிவேனோ! பொன் மாலை அணிந்தவனும் |
| கடல்
கால்கிளர்ந்த வென்றி நல் வேல் | கடலையே கலக்கிய
வெற்றியை உடையவனும் நல்ல வேலினை உடையவனும் ஆகிய |
| வானவரம்பன்
அடல் முனை கலங்கிய | வானவரம்பன்
தாக்குமுனையில் கலங்கிய |
| உடை மதில் ஓர்
அரண் போல | உடைந்துபோன மதிலைக்
கொண்ட ஒரே அரணைப் போல |
| அஞ்சுவரு
நோயொடு துஞ்சாதேனே | அச்சமெனும் பிணியோடு
தூங்காமல் கிடக்கின்றேன். |
| | |
| #46 மருதம்
அள்ளூர் நன்முல்லையார் | #46 மருதம் அள்ளூர்
நன்முல்லையார் |
| சேற்று நிலை
முனைஇய செம் கண் காரான் | சேற்றில் நிற்பதை
வெறுத்த சிவந்த கண்களையுடைய எருமை |
| ஊர் மடி
கங்குலில் நோன் தளை பரிந்து | ஊரார் உறங்கும்
இருளில் தனது வலுவுள்ள கயிறை அறுத்துக்கொண்டு |
| கூர் முள் வேலி
கோட்டின் நீக்கி | கூரான முள்ளாலான
வேலியைத் தனது கொம்பினால் தட்டிவிட்டு |
| நீர் முதிர்
பழனத்து மீன் உடன் இரிய | நீர் மிக்க குளத்தில்
மீன்கள் எல்லாம் வெருண்டோட |
| அம் தூம்பு
வள்ளை மயக்கி தாமரை 5 | அழகிய துளையையுடைய
வள்ளைக்கொடியைச் சிதைத்துக்கொண்டு, தாமரையின் |
| வண்டு ஊது பனி
மலர் ஆரும் ஊர | வண்டுகள்
ஒலியெழுப்பும் குளிர்ந்த மலரை ஆசையுடன் தின்னும் ஊரனே! |
| யாரையோ நின்
புலக்கேம் வார்_உற்று | உன்னை யாம்
கடிந்துகொள்வதற்கு நீ யாரோ? நீளத் தொங்கவிடப்பட்டு |
| உறை இறந்து
ஒளிரும் தாழ் இரும் கூந்தல் | கீழிறங்கும் மேகத்தைக்
காட்டிலும் பளபளத்துத் தாழ்ந்து விழும் கரிய கூந்தலையுடையவள் |
| பிறரும்
ஒருத்தியை நம் மனை தந்து | ஒருத்தியை, இவ்வூரார்
நம் மனைக்குக் கூட்டிவந்து |
| வதுவை
அயர்ந்தனை என்ப அஃது யாம் 10 | “நீ அவளை மணந்தாய்”
என்று கூறினர்; அதனை நாங்கள் |
| கூறேம் வாழியர்
எந்தை செறுநர் | கூறவில்லை; நீ
வாழ்வாயாக! பகைவரின் |
| களிறு உடை
அரும் சமம் ததைய நூறும் | யானைப் படையைக் கொண்ட
அரிய போரினை சிதையுமாறு கொல்லும் |
| ஒளிறு வாள்
தானை கொற்ற செழியன் | ஒளிவீசும் வாள்படையைக்
கொண்ட வெற்றி பொருந்திய செழியனது |
| பிண்ட நெல்லின்
அள்ளூர் அன்ன என் | நெல்பொலி கொண்ட
அள்ளூர் நகரைப் போன்ற, எனது |
| ஒண் தொடி
நெகிழினும் நெகிழ்க
15 | ஒளிரும் வளையணிந்த
தலைவியின் அழகு குன்றினும் குன்றுக; |
| சென்றி பெரும
நின் தகைக்குநர் யாரோ | போய்விடு பெருந்தகையே!
உன்னைத் தடுப்பவர் யாருமில்லை. |
| | |
| #47 பாலை
ஆலம்பேரி சாத்தனார் | #47 பாலை ஆலம்பேரி
சாத்தனார் |
| அழிவு இல்
உள்ளம் வழிவழி சிறப்ப | கொண்ட உறுதியினின்றும்
பிறழ்வுபடாத உள்ளம் பன்னெடுங்காலம் சிறந்து விளங்க, |
| வினை இவண்
முடித்தனம் ஆயின் வல் விரைந்து | இவ்விடத்தில் வந்த
வேலையை முடித்தோமென்றால், மிகவும் விரைவாக |
| எழு இனி வாழிய
நெஞ்சே ஒலி தலை | எழுவாயாக, நெஞ்சே நீ
வாழ்வாயாக; தழைத்த உச்சியினையுடைய |
| அலங்கு கழை நரல
தாக்கி விலங்கு எழுந்து | ஆடுகின்ற மூங்கிலை ஒலி
எழுமாறு தாக்கி, குறுக்காக எழுந்து |
| கடு வளி
உருத்திய கொடி விடு கூர் எரி
5 | சூறாவளி வெப்பமுறச்
செய்த, பக்கங்களில் நீண்டும், கூரான கொழுந்துவிட்டும் எரியும் நெருப்பு |
| விடர் முகை
அடுக்கம் பாய்தலின் உடன் இயைந்து | பிளவுகளும் குகைகளும்
கொண்ட மலைச் சரிவில் பரந்து விரிதலால், அதனுடன் சேர்ந்து, |
| அமை கண் விடு
நொடி கண கலை அகற்றும் | மூங்கில் கணுக்கள்
வெடித்தலால் எழும் ஒலி மான் கூட்டத்தை விரட்டும் |
| வெம் முனை
அரும் சுரம் நீந்தி கைம்மிக்கு | கொடும் போர்முனையைப்
போன்ற அரிய பாதையைக் கடந்து, அளவுகடந்து, |
| அகன் சுடர் கல்
சேர்பு மறைய மனை_வயின் | பெரிய ஞாயிறு மலையைச்
சேர்ந்து மறைய, வீட்டில் |
| ஒண் தொடி
மகளிர் வெண் திரி கொளாஅலின் 10 | ஒளிரும் வளையணிந்த
பெண்கள் வெள்ளிய திரிகளைக் கொளுத்த, |
| குறு நடை
புறவின் செம் கால் சேவல் | சிறுநடை போடும்
புறாவின் சிவந்த கால்களையுடைய ஆண்புறா |
| நெடு நிலை
வியன் நகர் வீழ் துணை பயிரும் | உயர்ந்த மாடங்களை உடைய
பெரிய மனையில் உள்ள தான் விரும்பும் பெடையை அழைக்கும் |
| புலம்பொடு வந்த
புன்கண் மாலை | தனிமைத் துயருடன் வந்த
துன்பத்தைத் தரும் மாலைவேளையில், |
| யாண்டு
உளர்-கொல் என கலிழ்வோள் எய்தி | “எங்கு இருக்கின்றாரோ”
என நினைத்துக் கலங்கியிருக்கும் தலைவியை அடைந்து, |
| இழை அணி நெடும்
தேர் கைவண் செழியன் 15 | இழைகள் அணியப்பெற்ற
நெடிய தேரினைக்கொண்ட வள்ளல்தன்மை நிறைந்த செழியனின் |
| மழை விளையாடும்
வளம் கெழு சிறுமலை | முகில்கள் தவழும் வளம்
மிக்க சிறுமலை என்னும் மலையின் |
| சிலம்பின்
கூதளம் கமழும் வெற்பின் | சாரல்களில் கூதளம்
கமழும் மலையின் |
| வேய் புரை பணை
தோள் பாயும் | மூங்கிலைப் போன்ற
பருத்த தோளில் பரவியுள்ள |
| நோய் அசா வீட
முயங்குகம் பலவே | பசலை நோயின் வருத்தம்
நீங்கப் பலமுறையும் முயங்குவோம். |
| | |
| #48 குறிஞ்சி
தங்கால் முட கொற்றனார் | #48 குறிஞ்சி தங்கால்
முட கொற்றனார் |
| அன்னாய் வாழி
வேண்டு அன்னை நின் மகள் | அன்னையே வணக்கம், நான்
கூறுவதைக் கேட்குமாறு வேண்டுகிறேன். ‘உனது மகள் |
| பாலும் உண்ணாள்
பழங்கண் கொண்டு | பாலையும் பருகாள்,
துன்பம் கொண்டு |
| நனி பசந்தனள்
என வினவுதி அதன் திறம் | மிகவும்
மெலிவடைந்துள்ளாள்’ என்று (காரணம்)கேட்கிறாய், அதன் காரணத்தை |
| யானும் தெற்றென
உணரேன் மேல் நாள் | நானும் தெளிவாக
அறியேன், முன்பொருநாள் |
| மலி பூ சாரல்
என் தோழிமாரோடு 5 | நிறைந்த பூக்களையுடைய
மலைச்சாரலில் என் தோழிமாருடன் |
| ஒலி சினை
வேங்கை கொய்குவம் சென்று_உழி | தழைத்த கிளைகளையுடைய
வேங்கை மரத்தின் பூக்களைக் கொய்யச் சென்றபோது |
| புலி புலி
என்னும் பூசல் தோன்ற | ‘புலி, புலி’ என்று
நாங்கள் கூச்சலிட, |
| ஒண்
செங்கழுநீர் கண் போல் ஆய் இதழ் | ஒளி பொருந்திய
செங்கழுநீரின் கண்போன்ற அழகிய இதழ்களை |
| ஊசி போகிய சூழ்
செய் மாலையன் | ஊசியினால் கோத்துத்
தைத்துக் கட்டிய மாலையை அணிந்தவன், |
| பக்கம்
சேர்த்திய செச்சை கண்ணியன்
10 | தலையின் ஒரு பக்கத்தே
சேர்த்துச் செருகிய வெட்சிப்பூத் தலைமாலை அணிந்தவன், |
| குயம் மண்டு
ஆகம் செம் சாந்து நீவி | இளமை தங்கும்
மார்பினில் சிவந்த சந்தனத்தைப் பூசி, |
| வரி புனை
வில்லன் ஒரு கணை தெரிந்து கொண்டு | வரிந்து கட்டிய
வில்லையுடையவன், ஒரு நல்ல அம்பைக் கையினில் கொண்டு, |
| யாதோ மற்று அம்
மா திறம் படர் என | ‘அந்தப் புலி சென்ற
வழி எது?’ என்று |
| வினவி
நிற்றந்தோனே அவன் கண்டு | வினவி நின்றான்;
அவனைக் கண்டு |
| எம்முள்_எம்முள்
மெய்ம் மறைபு ஒடுங்கி 15 | எமக்குள்ளே
ஒருவரையொருவர் மறைத்துக்கொண்டு |
| நாணி
நின்றனெமாக பேணி | நாணி நின்றோம்,
அதனால், ‘அக்கறையுடன் |
| ஐவகை வகுத்த
கூந்தல் ஆய் நுதல் | ஐந்துவகையாக வகுத்த
கூந்தலையும், அழகிய நெற்றியையும், |
| மை ஈர் ஓதி
மடவீர் நும் வாய் | கரிய நெய்தடவிய
கொண்டையினையும் உடைய இளமங்கையரே! உமது வாயில் |
| பொய்யும் உளவோ
என்றனன் பையென | பொய்யும் உண்டோ?’
என்றனன், (பின்னர்) மெதுவாகச் செல்லுமாறு |
| பரி முடுகு
தவிர்த்த தேரன் எதிர்மறுத்து 20 | தன் தேரின்
குதிரைகளின் வேகத்தைத் தடுத்தவன், எதிர்நோக்கலாக |
| நின் மகள்
உண்கண் பல் மாண் நோக்கி | நின் மகளின் மையுண்ட
கண்களைப் பலமுறை நோக்கிச் |
| சென்றோன் மன்ற
அ குன்று கிழவோனே | சென்றான், அந்தக்
குன்றுக்கு உரியவன்; |
| பகல் மாய்
அந்தி படு_சுடர் அமையத்து | பகல் முடிந்த
அந்தியில் மலையில் ஞாயிறு மறையும் நேரத்தில் |
| அவன் மறை தேஎம்
நோக்கி மற்று இவன் | அவன் சென்று மறைந்த
திசையை நோக்கியவாறே, ‘இவனே |
| மகனே தோழி
என்றனள் 25 | ஆண்மகன், தோழியே’
என்றாள் உன் மகள்; |
| அதன் அளவு
உண்டு கோள் மதி வல்லோர்க்கே | அது எத்தகையது என்று
அறிவு மிக்கோர் அறிந்துகொள்வார்’. |
| | |
| #49 பாலை
வண்ணப்புற கந்தரத்தனார் | #49 பாலை வண்ணப்புற
கந்தரத்தனார் |
| கிளியும்
பந்தும் கழங்கும் வெய்யோள் | கிளி, பந்து, கழங்கு
ஆகியவற்றை விரும்பியள் (இப்போது) |
| அளியும்
அன்பும் சாயலும் இயல்பும் | அருள், அன்பு, மென்மை,
செயல் ஆகியவற்றில் |
| முன்_நாள்
போலாள் இறீஇயர் என் உயிர் என | வேறுபட்டுள்ளாள்; “என்
உயிர் போவதாக” என்று கூறி, |
| கொடும் தொடை
குழவியொடு வயின் மரத்து யாத்த | வளைந்த தொடையினை உடைய
கன்றுடன் மரத்தில் கட்டப்பெற்ற |
| கடுங்கண்
கறவையின் சிறுபுறம் நோக்கி
5 | ஆசைமிக்க பசுவைப் போல,
(அவள்) முதுகினைப் பார்த்து, |
| குறுக வந்து
குவவு நுதல் நீவி | கிட்டே வந்து
குவிந்திருக்கும் நெற்றியைத் தடவி, |
| மெல்லென
தழீஇயினேன் ஆக என் மகள் | மென்மையாக
தழுவிக்கொண்டேனாக – என் மகள் |
| நன்னர் ஆகத்து
இடை முலை வியர்ப்ப | என்னுடைய நல்ல
மார்பின் முலைகளிடையே வியர்வை உண்டாக |
| பல் கால்
முயங்கினள்-மன்னே அன்னோ | பலமுறை என்னைத்
தழுவிக்கொண்டாள்; ஐயகோ! |
| விறல் மிகு
நெடுந்தகை பல பாராட்டி 10 | வெற்றி மிகு
பெருந்தகையாளன் பலபடியாகப் பாராட்ட, |
| வறன் நிழல்
அசைஇ வான் புலந்து வருந்திய | பட்டுப்போன மரநிழலில்
தங்கி, தலையை மேல்நோக்கிப் பார்த்து வருந்தும் |
| மட மான் அசா
இனம் திரங்கு மரல் சுவைக்கும் | இளையமானின் தளர்வுற்ற
கூட்டம் வற்றிய மரல் செடிகளைச் சுவைக்கும் |
| காடு
உடன்கழிதல் அறியின் தந்தை | பாலைநிலத்தில்
உடன்போகுதலை அறிந்திருந்தால் – இவள் தந்தையின் |
| அல்கு பதம்
மிகுத்த கடி உடை வியல் நகர் | உணவிருப்பு மிகுந்த
காவல் பொருந்திய அகன்ற இல்லத்தில் |
| செல்வு_உழி
செல்வு_உழி மெய் நிழல் போல 15 | செல்லுமிடமெல்லாம்
கூடவரும் நிழல் போல |
| கோதை ஆயமொடு
ஓரை தழீஇ | மாலை சூடிய தோழியரோடு
ஓரை விளையாட்டில் |
| தோடு அமை அரி
சிலம்பு ஒலிப்ப அவள் | கூடு போன்ற சிலம்பின்
பரல்கள் ஒலிக்க, அவள் |
| ஆடுவழி_ஆடுவழி
அகலேன்-மன்னே | ஆடுகின்றபோதெல்லாம்
அகலாதிருந்திருப்பேனே! |
| | |
| #50 நெய்தல்
கருவூர் பூதஞ்சாத்தனார் | #50 நெய்தல் கருவூர்
பூதஞ்சாத்தனார் |
| கடல் பாடு
அவிந்து தோணி நீங்கி | கடலில் ஓசை குன்றி,
தோணிகள் கடலைவிட்டு நீங்கி(க் கரையில் கிடக்க) |
| நெடு நீர்
இரும் கழி கடு_மீன் கலிப்பினும் | நெடியவாய் நிறைந்த
நீரைக்கொண்ட பெரிய கழியில் சுறாமீன்கள் செருக்கித் திரிந்தாலும், |
| வெவ் வாய்
பெண்டிர் கௌவை தூற்றினும் | கொடிய பேச்சைக்கொண்ட
பெண்டிர் பழிசொல்லித் திரிந்தாலும், |
| மாண் இழை
நெடும் தேர் பாணி நிற்ப | நன்கு
அலங்கரிக்கப்பட்ட நீண்ட தேர் காத்துநிற்கப், |
| பகலும்
நம்_வயின் அகலான் ஆகி
5 | பகலிலும் நம்மைவிட்டு
அகலாதவனாகி, |
| பயின்று
வரும்-மன்னே பனி நீர் சேர்ப்பன் | (முன்பெல்லாம்)அடிக்கடி
வருவானே! குளிர்ந்த கடற்கரையையுடைய தலைவன்; இப்பொழுதோ, |
| இனியே மணப்பு
அரும் காமம் தணப்ப நீந்தி | ஒன்றுசேர்வதற்கு
அரிதாயிருந்த (பழைய)விருப்பம் நீங்கிவிட, (இப்பொழுது இருக்குமிடத்தைத்) துறந்து |
| வாராதோர்
நமக்கு யாஅர் என்னாது | வராமலிருப்பவர் நமக்கு
யார் என்று வாளாவிராமல், |
| மல்லல் மூதூர்
மறையினை சென்று | (இப்பொழுது தலைவன்
இருக்கும் அந்த)வளமிக்க பழமையான ஊருக்கு மறைவாகச் சென்று |
| சொல்லின் எவனோ
பாண எல்லி 10 | (அவனிடம்) சொன்னால்
என்ன பாணனே!, “இரவில் |
| மனை சேர்
பெண்ணை மடி வாய் அன்றில் | (நம்)வீட்டைச்
சேர்ந்துள்ள பனைமரத்தில், வளைந்த அலகையுடைய அன்றில் பறவைகள் |
| துணை ஒன்று
பிரியினும் துஞ்சா காண் என | ஏதேனும் ஒரு துணை
பிரிந்திருந்தாலும் தூங்கமாட்டா, காண்பாயாக என்று |
| கண் நிறை நீர்
கொடு கரக்கும் | கண்ணில் நிறைந்து
இருக்கும் கண்ணீரைக்கொண்டு தன் துயரை மறைப்பாள் |
| ஒண் நுதல்
அரிவை யான் என் செய்கோ எனவே | ஒளிபொருந்திய
நெற்றியையுடைய தலைவி, இதற்கு யான் என்ன செய்வேன்?” என்று. |
| | |